陳嘉慧公開浪漫求婚影片 出動航拍機氣派十足場地佈置顯心思
現年27歲嘅TVB上位小花陳嘉慧(Erica),喺上年10月閃嫁圈外男友Calvin,上月更宣布懷孕喜訊。Erica一直未有公開老公外貌,直至日前佢喺社交網站上載絕密求婚影片,大家除咗睇到其老公外貌之外,更睇到佢點樣用超豪華嘅方式抱得美人歸。
陳嘉慧日前喺社交網站上載絕密求婚影,並留言話:「The happiest year of my life❤️2023❤️ #2023 #myxiabb#」,從片中所見,求婚場地佈置得非常有心思,除咗有二人嘅合照之外,仲有大量玫瑰、氣球及有一個超大型嘅「Marry Me」燈牌。Calvin單膝跪地,向Erica求婚,之後女方戴上巨鑽戒指,二人甜蜜錫錫,場面氣氛勁浪漫。而整個過程男方更出動航拍機喺大廈外圍拍攝,極具氣派。
陳嘉慧喺12歲時跟媽媽移居日本並喺當地讀書,2017年參加藝員訓練班後正式入行,曾飾演《溏心風暴3》護士、《BB來了》接待員等大配角,直至2019年飾演《解決師》陳佩慧、《迷網》牛嘉碧等角色加深觀眾注意,同時佢亦向主持方面發展,成為《Think Big天地》主持一份子,又拍攝《Ben Sir睇樓團》、《大玩特玩》、《眼睛去旅行》等綜藝節目。前年更首次擔正做女主角,喺《愛上我的衰神》飾演「人生管理員」(亦所謂「衰神」)潘小渝,之後佢接拍《回歸》、《法證先鋒V》、《法言人》、《你好,我的大夫》及喺新劇《本尊就位》再次擔正做女一,不過佢係正值上位期與男友拉埋天窗。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!