陳瀅回應龔嘉欣有骨對答指視后競爭大 已積極準備盼於台慶頒獎禮冧莊

TVB小生花旦位置一直競爭激烈，龔嘉欣早前接受媒體訪問時，被問到點睇陳瀅於《美麗戰場》表現就避而不答。不過句句有骨咁表示其實自己與陳瀅同年，只係自己19歲就簽TVB資歷深，係捱返嚟，好感恩由小蕃薯捱到宜家。對於龔嘉欣呢番說話，陳瀅就發表回應，仲話自己為出席台慶延遲返加拿大溫哥華探屋企人，又希望自己可以於頒獎禮奪獎。

陳瀅日前與周嘉洛、JW王灝兒、朱敏瀚及麥美恩以《痞子殿下》古裝造型為下周六（19日）《萬千星輝賀台慶》開幕表演綵排，被問到龔嘉欣疑眼紅一事，陳瀅就表示二人從未合作過，雖然有聽聞呢件事，但無親眼睇過原裝訪問版本好難作準，因為有好多唔同嘅報道版本，相信係有加鹽加醋成分。對於龔嘉欣主演嘅《新四十二章》趕得切於頒獎禮播映，有機會爭奪視后寶座，陳瀅就直言仲有好多台慶劇未播及好多好演員有機會獲提名。

比起角逐視后，陳瀅更希望冧莊「最佳衣着獎」，表示已與造型師溝通要著啲同以前唔同嘅造型，指戰衣必須要靚，而唔係性感就係等於靚，透露多數會著黑色裙。不過，陳瀅又指因早前生日常與《痞子殿下》和《美麗戰場》台前幕後食生日飯，要開始積極瘦身做準備。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！