隱形戰隊｜林凱恩為郭子豪擋刀死亡 網民激讚內心戲有進步：TVB監製應畀多啲機會佢

林凱恩2015年參選香港小姐競選勇奪友誼小姐，隨即加入TVB，憑處境劇《愛·回家之開心速遞》Bonnie一角漸為人所認識，2020年出演《降魔的2.0》孕婦Ling一角，更被觀眾激讚演技大躍進。早前有傳林凱恩扭計唔續約，因而被調去綜藝組主持《流行都市》及於古裝賀歲喜劇《黃金萬両》中連角色名都無，慘變茄喱啡。近日林凱恩於劇集《隱形戰隊》「幸福學會逼良為娼」個案中飾演主要人物，雖然僅出場3集，但角色相當有發揮，內心戲連場，被網民大讚演技有進步。

林凱恩於《隱形戰隊》造型多變，由學生妹、侍應到性感造型都有。劇情講述馬詩婷（林凱恩飾）中學時期傾慕大力（郭子豪飾），時時去睇佢打波，卻被郭子豪身邊朋友取笑滿臉痘痘；事隔多年後二人於林凱恩做侍應嘅餐廳相遇，仲發展成情侶關係。後來林凱恩真實身份曝光，原來佢一直被許素妍（莊思明飾）逼良為娼，當佢要求退出幸福學會之際，卻險與會員之一游國堃（許俊豪飾）發生關係時遭捏死，林凱恩拿起煙灰缸自衛時令許俊豪死亡。及後，郭子豪搵到林凱恩躲藏之地，二人於林凱恩舊屋過咗一晚，第二朝林凱恩被追殺，期間郭子豪為保護佢而中槍，當佢險被刀桶死之際，林凱恩幫佢擋咗一刀而即場死亡。

林凱恩於劇中七情上面，演繹出角色嘅複雜情緒，網民紛紛大讚表現出色，演技有進步，認為TVB監製應該要畀多啲機會林凱恩，調佢做下午播出嘅《流行都市》太浪費：「演技自然，令人動容」、「角色咁複雜，內心戲完全handle到，叻女」、「鄰家女孩feel，有觀眾緣，呢次真係夠哂突破」、「妳演得好好，我跟住妳喊。」、「隱形戰隊裡第一次認識妳，好得，馬上做左你的粉絲」、「演技非常自然，本身無追開套劇，就係睇到有妳先睇呢兩集，個人覺得比同劇嗰幾個女主角更出色，另外同子豪好合襯好有cp感。繼續努力，加油！支持妳！」、「演技真係不得了」、「林凱恩演技一大突破，開始建立自己風格」、「禾（我）看見到你努努努力，so加油呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！