Yahoo奇摩新聞 【電影LOL．外語930】《茱莉對茱莉亞－隔代廚神》只要有心 人人都可以係食神
為咗保持社交距離，防止疫情擴散，好多朋友選擇留守家中，衍生出唔少住家廚神！呢期睇社交媒體，睇得最多一定係朋友大顯廚技，狂post自家美食，好似大熱400次咖啡、雲朵雞蛋等等，仲有唔少高難度菜式糕點，唔係因為新型肺炎都唔知原來朋友們咁煮得！
煮到唔知煮咩好嘅朋友，可以喺Netflix睇返2009年上映嘅《茱莉對茱莉亞－隔代廚神》攞靈感。電影由諾拉艾芙朗執導，根據兩段真人真事改編，分別由梅麗史翠普飾演美國受歡迎兼入哂屋嘅廚神 茱莉亞查特（Julia Child）及愛美雅當絲(Amy Adams)飾演茱莉鮑維爾（Julie Powell）。
《茱莉對茱莉亞－隔代廚神》講述兩個相隔半個世紀的女廚神，如何透過同一本食譜、同一樣的大無畏精神，烹調出她們的精彩人生。 茱莉亞查特(梅麗史翠普 飾)是40年代一位家傳戶曉的美國女廚師，成名前她只是個跟隨丈夫到法國巴黎定居的女人仔，因為時間太多又鍾意食，所以決定去藍帶學院學廚，好勝嘅佢戰勝語言障礙及無視他人嘅輕蔑，學有所成，變身成為煮得之人。
喺法國學識何謂美食嘅佢決定將法國菜帶返美國，以出色的廚藝加上大無畏精神，出烹飪書、上電視教煮法菜，成為廣受觀眾愛戴的一代廚神，從此改寫咗美國主婦家常菜單！
相隔半世紀，年近三十的中女茱莉鮑維爾(愛美雅當絲飾)，眼見身邊好友個個出人頭地但自己就事業無成，有感人生空虛，於是展開一個有點神經質的挑戰自我計劃：365天內根據偶像茱莉亞查特的烹飪書《Mastering the Art of French Cooking》食譜烹調524個菜式，再於網誌撰寫經驗和心得！
日煮夜煮當中都經過唔少失敗，但一諗起偶像茱莉亞查特不易放棄嘅精神，佢決定咬緊牙關繼續煮，完成呢個一年煮524個菜嘅大計，煮下煮下吸引咗媒體關注，得到唔少報導，仲連茱莉亞查特都知有個中女挑戰佢嘅食譜！不過茱莉鮑維爾最大得著就係發現人生中最大的成就，原來不一定是名與利，而是能與最愛的人共享生命中的每一餐美點！
各位香港在家煮神，不妨搵Julia Child本食譜挑戰下，除咗可以增進廚藝之外，話唔定仲可以好似茱莉鮑維爾煮到變KOL，出書做作家仲被改編成電影，名利雙收之餘仲搵到第二人生。畢竟，疫情教曉咗我哋匯豐都會無息派 ，無一份工係鐵飯碗，單靠一種技能過生活真係好無保障，趁依家有時間不如學多樣嘢傍身！
更多電影文章
【電影LOL】迪士尼翻拍停不了 搵「Elton John」拍新版《羅賓漢》
【電影LOL】內地翻拍《五個撲水的少年》 角色設定改到面目全非
【電影LOL．煲劇抗疫】唐詩詠大讚！韓劇《夫妻的世界》大婆復仇無得輸
