Yahoo奇摩新聞 【電影LOL】特效片有數返 片廠搵Ryan Gosling拍狼人傳搏一搏
近年影片串流平台崛起，改變咗觀眾嘅觀影習慣，只要留意戲院正在上映嘅電影片種，小品、文藝片越嚟越少，因為呢類戲喺屋企睇都得。反而喺大銀幕加強勁音響系統之下先睇得過癮嘅動作特效電影越嚟越多，你就知道只有呢類所謂”Event Movie”，先係戲院賣座保証，好似迪士尼就有Marvel系列，華納有DC人物系列。
另一大公司Universal自家製作嘅合家歡動畫《壞蛋獎門人》雖然極成功，不過故事因此受限，所以Universal決定重啟自家怪物片系列！
其實早於1930年代，Universal影業製作咗一系列恐怖片，開創咗一個全新嘅電影類型—怪物片。其中最受歡迎包括吸血殭屍德古拉、科學怪人、木乃伊、隱形客同狼人！既然片廠旗下無超級英雄，翻拍家傳戶曉、好人又唔算壞又壞唔得哂嘅怪物都幾合理。今年Universal小試牛刀，由Elisabeth Moss主演嘅新版《隱形客》（Invisible Man)叫好叫座，拍攝成本唔貴，大約7百萬美金，換嚟全球1億2千萬票房，成績驕人！
見條數咁好，Universal打鐵趁熱宣佈翻拍「狼人」— 唔係X-Men嗰個，而係被《吸血新世紀》「參考」咗嘅「狼人族」，仲搵嚟《星聲夢裡人》男星Ryan Gosling主演。相信選角方面都下過一啲功夫，因為要搵個有演技有知名度但無拍過任何「超級英雄」角色（無論電影或電視劇！）嘅荷里活影星都唔易，加上狼人背景亦正亦邪，未必個個肯做！
狼人故事耳熟能詳，不外乎講主角被狼咬及被詛咒，每逢月圓之夜就會化身成狼，極度兇殘四出傷人，一天光變返做人又唔記得自己做過咩嚟，每每見返案發現場知道自己係兇手就會好自責！多年以嚟，電影中嘅狼人設定大同小異，睇《吸血新世紀》班狼族都係一到月圓就失控，所以要縛實自己免得四出作惡，唯一差別就係隻狼有幾惡，好似《吸血新世紀》嘅Jacob就似狼狗多過狼！
其實Universal於2010年已經翻拍過狼人故事，仲搵咗《非常嫌疑犯》、《銀河守護隊》嘅Benicia Del Toro做男主角，影帝Anthony Hopkins做佢老豆，《無聲絕境》Emily Blunt做佢女友，可惜套戲出嚟劣評如潮，被評故事空洞又毫無新意，最敗筆係超現實嘅設定，你見到Anthony Hopkins手腳靈活飛簷走壁，你都覺得唔可信啩？結果全球票房低收，蝕晒本！
今轉由Ryan Gosling主演嘅版本，將會由監製《隱型客》嘅Lauren Schuker Blum同有份寫劇集Orange is the New Black嘅Rebecca Angelo執筆編劇，要將「狼人」變做金蛋，相信要落足心機寫好個故事先得！
更多電影文章
【電影LOL】湯告魯斯密謀坐SpaceX上太空拍戲 爭做荷里活升空第一人
【電影LOL．煲劇部】「犯法就係犯法」《時效警察》專查無得問責過期舊案
【電影LOL】今個星期睇咩戲 《叔．叔》《墮落花》《誠實選舉媽》《罪惡島》
