Yahoo奇摩新聞 【電影LOL】陳沖拍女排名將郎平紀錄片 國際上映前抽起 為咗賺人仔？
因為新冠病毒，內地自農曆新年起就無新片上映。成個賀年檔套套目標幾億人仔起跳嘅賀歲片，全部上唔到要改期，當中包括陳可辛導演作品、講述中國女排運動員血淚史嘅《中國女排》。套戲搵嚟鞏俐飾演女排名將郎平，單睇劇照，成個造型確係幾似嘅。不過《中國女排》暫時仲未公布新映期，似乎仲要等下先可以喺大銀幕睇到中國女排史。
郎平喺國際體壇佔有一席位，分別以運動員及教練身份，於奧運取得驕人成績。佢嘅職業生涯相當精彩，亦因此吸引咗華裔女電影人陳沖拍攝有關郎平嘅紀錄片《鐵榔頭》！陳沖演而優則導，參演作品無數包括《末代皇帝溥儀》、《太陽照常升起》、《如懿傳》等，導演作品唔算多不過叫好叫座，其中《天浴》更為佢帶嚟金馬獎最佳影片、最佳改編劇本及最佳導演等多個獎項！
唔駛瘋狂行影展紅地氈搏曝光增加知名度，陳沖以作品脫穎而出，早早就成為國際級演員，幕前演出定幕後製作都相當國際化，自身經歷成為其中一個拍攝《鐵榔頭》嘅原因。除咗佢同郎平年齡接近外，兩人都於國內成名，然後到美國留學兼工作，陳沖拍攝荷里活電影、郎平出任美國排球隊教練。因為事業發展而遭到內地民眾嘅指責，出賣國家感情云云，2008年郎平帶領嘅美國女排於奧運奪得銀牌時，就被一堆玻璃心話係叛徒！
陳沖就盛讚郎平喺處理中美兩地游走方面比佢有智慧得多，加上佢本身亦係體育迷，熱衷睇各樣比賽，出於對郎平嘅好奇所以決定拍攝紀錄片《鐵榔頭》，主要聚焦郎平於1984年洛杉磯奧運會奪金後移居美國嘅時光，其中亦會講述其心路歷程及排球哲學等。
《鐵榔頭》由美國公司Mandalay Sports Media(MSM）及IOC奧運台共同出品製作，原定於香港時間6月8日於youtube放映，喺由多倫多電影節、辛丹斯電影展等20個電影節合辦，為新冠疫情籌款嘅「We are One: A Global Film Festival」中做全球首映。不過活動舉行前一日突然叫停，因為收到廣大內地觀眾嘅回應，決定將《鐵榔頭》改於內地做首映，會盡快公布映期咁話。
通常都係電影去咗外地國際影展，因為「技術」原因臨時叫停，好少掉轉係明明可以喺外國播映但自己抽起。竟然放棄個面向全球嘅平台都要做中國首映？《鐵榔頭》全外資，拍之前又無攞批文，唔符合國內作品要求，理論上要以引進片方式先有機會喺內地上映，但紀錄片以郎平為中心，又幫中國奪金又幫美國攞銀，好難想像可以唔被審查就上得，陳沖用咗3年先拍好《鐵榔頭》，唔通為咗內地觀眾不惜重新剪接？定係有咩政治考量有得免審直接上映？真係得當事人先知。
更多電影文章
