電影LOL︳《驅魔人：信仰者》輸口碑贏票房 《汪汪隊立大功：超班大電影》收破1億

上周末北美票數字出爐，證明咗大片以外，另外2類片種如何在荷里活搵食。

經典恐怖片嘅重啟之作《驅魔人：信仰者》成為今期票房之冠，即使喺美國被評為R級（未成年觀眾需由成人陪同入場，相當於香港IIB級），口碑亦相當麻麻，Rotten Tomato只有22％嘅觀眾低分口碑，但係收到2720萬美元（下同）封王。數字比起預測嘅3500萬少，但就介乎《恐懼鬥室X》同《詭修女2》之間。

9月10月係北美戲院淡季，過完暑假而感恩節又未有耐，唔知幾時開始有人諗到10月係萬聖節，好似睇鬼片恐怖片好應節，於是9至10月就成為呢類電影嘅旺季，幫片商同戲院商撐一撐。《恐懼鬥室X》同《詭修女2》就係9月上嘅，之前介紹過、女醫生偷食小鮮肉搞到被交換肉身嘅Suitable Flesh亦即將上映。

話晒《驅魔人》係恐怖片界經典，但係呢套《驅魔人：信仰者》成本只係3000萬，而連埋國際票房，開畫已經共收4510萬。如果以行內方程式、票房係成本3倍就足以回本的話，咁《驅魔人：信仰者》睇落都可以話封到半道蝕本門。但係，片商環球(Universal) 2021年以4億買起《驅魔人》版權，到底今鋪嘅《信仰者》係賺定蝕？我地可以搵日再詳細講下。

而周末票房亞軍係同《驅》極大反差嘅 《汪汪隊立大功：超班大電影》(PAW Patrol: The Mighty Movie)，收1170萬。而家《汪》全球累收8710萬美元，已經超越上一套2021年推出嘅汪汪隊大電影。外界估計今集全球票房應該可以破一億，加埋其他周邊產品、電視、網上影片串流等等收入，而家做專攻小朋友嘅IP，分分鐘好執過拍套隨時仆直嘅大片。

更多電影文章

電影LOL 今期睇咩戲︳紮職2／絕對追擊／玩謝華爾街行動／忌怪島／星夢學園10th Story

電影LOL︳本尊加持 女主角搶鏡「貓王嫂」Priscilla傳記片收好評 變陣強攻奧斯卡

電影LOL︳金馬獎入圍名單公布 姜濤「細佬」黃梓樂同林保怡爭男配角 余香凝鍾雪瑩首度角逐影后

電影LOL︳大片唔收得 片商轉攻紀錄片 Elon Musk自傳紀錄片版權爭崩頭

電影LOL︳「台版瀧澤秀明」邱澤易容式演繹 新片《最好的相遇》演智障準爸爸 觀眾認唔出！

電影LOL︳少數內地劇被日本買版權翻拍 《隱秘的角落》日片版Gold Boy大人細路齊齊dark

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！