Yahoo奇摩新聞 電影LOL︳塔倫天奴收山之作？第十套作品拍70年代女影評人傳奇
鬼才導演昆頓塔倫天奴執唔止一次提過自已拍夠10套電影，又或者60歲就收山，因為佢認為導演能力會隨住時間越嚟越差，分分鐘過哂時自己都唔知，唔想原地踏步最好就係見好就收！
如果2集《標殺令》當1部咁計，昆頓塔倫天奴已經拍咗9套電影兼今個月就60歲生日，唔知佢會唔會如佢所言收山呢？不過根據外媒The Hollywood Reporter報導，導演第10部電影已經有雛型，佢將以已故著名影評人Pauline Kael為中心拍攝名為The Movie Critic電影。
Kael活躍於70年代，身兼影評人、散文及小說家，以筆戰編輯、電影製片人聞名。70年代尾因為名演員華倫比提（Warren Beatty）嘅命令而短暫做過派拉蒙片廠嘅顧問。據聞The Movie Critic設景於70年代末嘅洛杉磯，與Kael任職派拉蒙時期重合。
The Movie Critic相信係繼《從前，有個荷里活》後又一寫俾電影嘅情書。暫時未知由邊位演員飾演女主角Pauline Kael，不過導演作品一向星光無限，如果The Movie Critic係佢嘅導演生涯完結篇，相信一定會有最完美嘅幕前幕後組合。
電影暫時仲未有片廠認領，不過最大機會The Movie Critic會落入為昆頓塔倫天奴發行《從前，有個荷里活》嘅Sony Pictures手。《從》為Sony帶嚟10個奧斯卡提名以及全球3.7億美元票房，加上導演同Sony 高層Tom Rothman關係良好，而且Sony破例將《從》電影版權俾返昆頓塔倫天奴，條件咁優厚，相信導演再次與Sony合作嘅成數相當高！
更多電影文章
電影LOL 今期睇咩戲︳沙贊！眾神之怒／那個男人／中國乒乓之絕地反擊／平凡英雄
電影LOL︳荷里活世紀爛片王The Room 居然都有人翻拍！
電影LOL︳楊紫瓊關繼威「全家」新劇重逢 《西遊ABC》吳彥祖演孫悟空
電影LOL︳金草莓獎謝拉列圖成最爛影帝 兩屆金像影帝湯漢斯都有獎攞？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
