電影LOL︳Barbie大賣 Mattel籌拍American Girl真人版電影 幕後主腦拍過恐怖片！

今年電影界最成功之作應該係《Barbie 芭比》，諗得出用Barbie講女性自主，加上搵啱卡士，宣傳策略做得到位，全球收14億元係應該嘅。

Barbie生產商Mattel比你同我對《Barbie 芭比》更有信心，因為套戲未上畫已經宣布，會為旗下一系列玩具開拍真人版電影，由Thomas 火車頭、Hot Wheels車仔到UNO紙牌遊戲甚至用嚟問無聊問題嘅Magic 8 Ball都有份，而且有晒編導人選，唔係吹水。至於Mattel旗下另一個娃娃玩具品牌American Girl亦會開拍真人版電影，日前就公布咗搵新晉電影人Lindsey Beer擔任監製同編劇。

American Girl（AG）喺香港嘅受歡迎程度，同Barbie 點都有距離，但喺北美地區唔少妹豬都會玩American Girl公仔，因為AG展示嘅係唔同國籍、種族以及信仰嘅小女孩面貌，而且仲會有本相關故事書一併出售。家長會覺得AG比Barbie有教育意義，有書店甚至間出成個角落買AG玩具。所以估計American Girl真人版電影，內容應該會同個玩具一樣擲地有聲。但係擔任監製同編劇嘅Lindsey Beer，前作Pet Sematary: Bloodlines係血腥恐怖片，試諗下啲AG電影版出現啲公仔曉郁嘅畫面……放心，Mattel已經為AG電影版訂下方向，會係校園電影加歷險元素，應該唔會變成《人工殺姬》(M3GAN)。

Mattel開拍AG真人電影版，唔係因為見《Barbie 芭比》收得先至去馬，甚至早喺2004年已經AG真人長片面世，不過只係以DVD發行同賣俾電視台。2019年已經有報導話，Mattel有意真係拍AG真人電影版，甚至已經搵埋片廠合作，結果因為疫情同編劇罷工，而家先開工。至於導演人選就仲未確定。

更多電影文章

電影LOL 今期睇咩戲︳蒼鷺與少年／五月的你，十二月的她／成功補習班／熱搜／電影 光之美少女 All Stars F

電影LOL︳《功夫熊貓4》預告片曝光 阿寶今次嘅對手係條變色龍

電影LOL︳大片齊仆直！今年14套2億美元鉅製 得呢套有錢賺

電影LOL︳金球獎《Barbie芭比》9項提名先贏《奧本海默》一仗 新增「電影與票房成就大獎」係乜？

電影LOL︳宮崎駿《蒼鷺與少年》北美開畫成票房冠軍 拎住2個影評人大獎直衝奧斯卡

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！