電影LOL︳Y2K青春片Mean Girls翻拍音樂劇版 當年女主角變晒中女拍超市廣告

2004年青春喜劇《辣妹過招》（Mean Girls）放映至今將近20年，電影入面尖酸刻薄高中女生們，日日全身著哂粉紅色自稱Plastic黨，飾演嘅演員發展大不同 － 當年最紅嘅童星Lindsay Lohan逃唔過童星魔咒，長大後又崩懷，怪行一堆導致事業插水，好彩近年重拾健康慢慢回歸大銀幕，上年幫Netflix拍咗套聖誕戀愛喜劇，又做埋媽媽，生活返回正軌。

飾演Plastic黨大家姐嘅Rachel McAdams發展順利，由甜心《忘了．忘不了》過渡至《焦點追擊》提名金像最佳女配角，連Marvel超級英雄《奇異博士》都有佢踪影！另一位Plastic Amanda Seyfried之後打開戲路，唔止飾演甜美女生，憑《曼克》提名金像最佳女配角，又憑劇集The Dropout提名艾美獎視后，有樣有演技！

片中另一童星Lacey Chabert國際知名度不如其他3位女星，不過喺美國相當入屋，因為佢早早轉型專拍Hallmark節日溫情電影，年年至少2部戲，堪稱聖誕片女皇，事業穩定兼有幸福家庭，生活美滿！

《辣妹過招》2018年改編成音樂劇大受歡迎，全美國巡迴演出超過800場、囊括12項美國劇場界最高榮譽東尼獎提名！音樂劇叫好叫座，於是再被改編成新版電影，繼續由《辣》創作大腦Tina Fey編劇及客串，卡士改由新生代演員Angourie Rice飾演女主角Cady，Plastic黨則分別由Renee Rapp、Bebe Wood及Avantika飾演。

《辣妹過招》粉絲可能會失望，因為新版唔係續集而係翻拍成音樂劇電影，無可能原班人馬上陣飾演Plastic，不過唔排除有客串嘅可能，話哂除咗Rachel McAdams外，其餘3位女角Lindsay Lohan、Amanda Seyfried及Lacey Chabert唔介意重塑《辣妹過招》角色，甚至為美國超市Walmart合體拍咗個2分鐘嘅聖誕廣告，想欣賞「辣妹」風采，唯有睇住廣告先啦！電影《辣妹過招》將於2024年1月美國上映。

更多電影文章

電影LOL 今期睇咩戲 ︳Marvel 隊長2／錄陰帶／永恆的記憶／東京復仇者2 血腥萬聖節篇-決戰／燃冬

電影LOL︳聲勢不及Netflix Disney+ Apple TV＋買起Snoopy搶收視

電影LOL︳12月飛東京動漫節睇星！同新田真劍佑Benedict Cumberbatch合照唔駛2千蚊

電影LOL︳80年代經典笑匠 丹尼迪維圖有意拍《掟阿媽出火車》續集

電影LOL︳《真的戀愛了》編劇再寫佳節故事 Genie釋放二千年精靈爆笑魔法

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！