香港人在北京 ｜陳展鵬吳若希配搭新鮮充滿火花 神預言JPEX事件被封神劇

由陳展鵬、吳若希、洪永城和戴祖儀等人主演嘅TVB劇集《香港人在北京》，喺今個星期一接棒《你好，我的大夫》播出，劇情主要講述徐港仁（陳展鵬飾）與任職律師嘅太太Helen（吳若希飾）婚姻美滿，不過因老婆誤信客戶，投資加密貨幣而受騙，損失大半身家。咁啱得咁橋佢又被公司委派仁到北京出任CEO，佢覺得係一個翻身機會，所以決定移居北京展開新生活。劇集喺首播後因劇情應景嘅關係，即被網民封為神劇。

喺首集，劇情就講到吳若希所飾演嘅律師因誤信客戶，深信投資加密貨幣可以賺大錢，直至睇新聞報道先發現受騙，之後身為苦主聯盟代表嘅佢哋接受《慌張西望》訪問，但又驚被人認出，所以佢哋除咗要求節目組幫佢哋打格仔同埋做聲音處理，仲自行變聲，場面非常搞笑。唔少網民睇完都覺得劇情應景，留言話：「又來神預言」、「JPEX 呢套嘢預知未來」、「律師 加密貨幣」及「套戲真係應景」等等。另外網民亦認為陳展鵬與吳若希有火花及演得好過癮，例如「好睇，比吳若希笑死」、「吳若希同陳展鵬變聲做訪問勁搞笑笑死我 你哋合襯」、「慌張西望嗰段真係笑爆」、「變聲真係好好笑」及「變聲個度笑爆」、「好睇喎， 煎pan同若希有新鮮感同火花」及「陳展鵬十吳若希有火花，現在香港需要多些歡笑，因為放在9點半，希望收視會好，支持展鵬。」等等。

另外，劇集仲有一個驚喜位，就係陳展鵬現實中嘅老婆單文柔，竟然驚喜為劇集客串老千一角，陳展鵬喺接受訪問時就話單文柔Phoebe喺選完港姐後就俾佢私有化，不過其實Phoebe一直都好想拍劇，同埋都係佢嘅小粉絲，所以好希望可以同佢合作。對於佢哋兩公婆未有同框機會，陳展鵬就直言老婆有啲失望。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！