香港同志遊行｜第五年無遊行 改為互動展覽 內地客嘆可惜 大會：未能擔保參與者安全

【Yahoo 新聞報道】今年「香港同志遊行」仍未能在街頭復辦，大會改為一連兩日於觀塘舉行「同志一日空間」活動，主題為「彩虹GPS教識我的三件事」，當中內容包括互動展覽、商戶攤位及導賞團等。主辦單位指雖未能在街頭舉辦遊行，但希望透過展覽及攤位吸引港人參與，接納多元及同志平權。

大會設互動展覽內容，包括名人出櫃故事、心理測驗及素人出櫃故事分享，展覽亦有展出過往同志遊行照片，強調「現身即抗爭」。展覽在今日（18日）中午開幕，參觀者絡繹不絕，場內人數長期維持近二百人。

「期待喺街上見到大家」

香港首次同志遊行於 2008 年 12 月舉行，至 2019 年遊行申請首次被警方拒絕，僅批准在中環愛丁堡廣場集會，往後改以網上集會、市集等形式，至 2023 年已是第五年無實體遊行。大會籌委 Cuby 指同志遊行「嚮往自由、咁歡樂」，暫時大環境氣候未太穩定及明朗，「我哋擔保唔到參與者嘅身心安全嘅話，我哋都唔會去做呢樣嘢」。因此今年大會並無入紙申請遊行，改以展覽形式進行，「但我哋仍然期待喺街上見到大家，期望可以真正喺街上做到同志遊行」。

對於同樂運動會等性小眾活動遭立法會議員非議，Cuby指「好多嘅歧視都係來自佢嘅無知。都唔輪到我擔心啦！佢哋有佢哋嘅自由，我都有我嘅自由，我都唔鍾意佢哋」。至於實體遊行變成展覽，大會亦無設入場人數目標，「有人嚟好好㗎喇！而家夜繽紛又咁吸引，見到有朋友過嚟，已經十分高興」。

阿正任彩虹大使：撐朋友點會有壓力

商台DJ黃正宜（阿正）獲委任為本年度彩虹大使，她稱並無受壓，也未收到網民抨擊。她指性小眾需要顧及別人的目光、考慮是否出櫃等，「我做彩虹大使壓力唔會比同志大」。她希望與性小眾同行，「作為一個朋友去支持大家，撐朋友點會有壓力！」若果有人質疑不應與同志交朋友，阿正笑稱：「我心諗……關佢咩事呀！」

溫先生特意由內地杭州來港參與是次活動。他指內地不論政府抑或性小眾社群，對平權議題都盡量低調，「睜一眼閉一眼就好」，他們在內地亦會低調稱同性伴侶為「室友」。他指今次來港的目標是了解港人對同志平權的態度和想法，以不同活動形式作借鏡，希望未來有機會在內地舉辦同類活動。他之前到過台灣參與同志遊行，今次在港則改為展覽，「跟想像中的差距有點大」，對此感到可惜，「規模、人數都小很多，希望以後可以愈來愈大吧！」

Clayton和朋友一同到場，「呢個圈子嘅issue（議題）都幾sad，但今次呢個群體嘅活動氛圍幾開心，都係值得鼓勵」。他在疫情期間才開始關注同志遊行的資訊，因此未曾參與實體同志遊行，但也樂於參與展覽活動，「香港都少有呢啲活動，所以更加想支持下，喺呢個環境嚟講，大家做到嘅嘢盡做，已經算係咁」，若明年復辦實體遊行，他亦想親身參與。

Angus和Adrian結伴到場，兩人均欣賞今年大會增設資訊性展板，講述不同的同志故事，「都同舊年幾唔同，睇吓人哋嘅故事又了解多啲知識，係attractive（吸引）」。對於今年仍然未能復辦遊行，他們都感到可惜，希望明年可參與遊行。

「始終係唔一樣，遊行係多啲人」

本身是大學生的Janice與兩名同學到場，三人亦曾參與同樂運動會。Janice認為展覽與遊行的效果不同，「始終係唔一樣，遊行係多啲人」，遊行可吸引公眾關注，但展覽在大廈8樓，「變咗呢個group嘅人先知嚟呢度」。與Janice同行的任同學也指展覽形式的凝聚力相對較低，「氣氛都差好遠」。

現場亦有約十多個攤檔，售賣多款「彩虹產品」，包括T恤、襟章、手機殼、即場手繪等。亦有機構在場宣傳正確性知識等。

香港同志遊行2023 - 同志一日空間

日期：2023年11月18-19日 (六、日)

地點：The Wave - 觀塘興業街4號8樓

時間: 中午12時至晚上7時

活動內容：展覽、攤位及工作坊

主題：彩虹GPS教識我的三件事