黃心穎憑歌寄意訴心聲 大玩自嘲加性感打扮 遭網民批評：轉行喇

黃心穎喺2019年爆出偷食人夫許志安，車內纏綿嘅片段全城哄動，二人形象雙雙跌落谷底，事業一鋪清袋。潛水近四年嘅佢喺噚日情人節（14日）推出新歌《Crown Me》，復出幕前做歌手。新歌MV喺網上進行直播，期間吸引逾300人同時在線觀賞MV直播，MV上載至今（2月15日下午4時），只有大約15萬觀看次數，網民反應冷淡。

喺《Crown Me》MV中，黃心穎一共有3個造型，當中有破格、性感大膽打扮，不時以「高抄」角度拍攝，大晒事業線及豐滿上圍。佢與多個舞蹈員合作，雖然佢嘅舞技唔算出色，不過差不多跳足成首歌，睇得出花咗唔少心機同時間。另外，MV中亦加入「安心事件」嘅心路歷程，佢將自己放入一個透明嘅箱入面，然後箱外嘅人就將佢叫價拍賣，期間仲有戴上面罩嘅人舉起「898」嘅牌子，疑似暗示大眾將佢物化及叫佢唔好再喺娛樂圈發展。

黃心穎喺MV簡介寫上「為了迎合別人的標準，人往往會偏離自己真實的樣子，並走得越來越遠。在壓力下，要追求分數和各種名銜。。。撫心自問，這些是不是自己真正想要的？得到後有令你快樂嗎？滿足嗎？」《Crown Me》係一首英文歌，由黃心穎自己包辦曲和詞，而男友泥鯭就有份編曲同擔任監製。喺歌詞方面，佢憑歌寄意訴心聲，不乏自嘲內容，例如叫大家封佢做八婆、自嘲Cheap、naughty等等。

MV喺噚晚8點出街，至今只有大約15萬觀看次數，當中有網民留言叫佢加油，例如「加油，期待下首更好作品」、「勇氣可嘉！」、「幾有新意,希望重新出發,加油」、「人誰無錯！支持你從新出發 努力加油」及「用心之作, 有誠意, 祝復出一切順利！」等等，不過大部份網民就留言鬧爆及批評佢，例如「無恥就是無敵的最佳演繹」、「其實唔睇之前發生什麼事，純以音樂同表演評論，音樂方面我覺得聽得好辛苦；跳舞方面，我覺得真係麻麻。如果佢要樂壇發展，真係今宵多珍重啦」、「我單純評演譯：要bitchy唔夠bitchy，要放又唔夠放，唔鹹又唔淡咁。要新開始，真係要做一個專業歌手的話，就要再努力。」、「真心講 … 真係唱功，舞蹈，觀賞性都非常麻麻」、「唱到咁 好心啦」、「好心正正經經搵份工算啦仲要發明星夢」、「個妝好肉酸，歌普通」、「轉行喇」、「超級難聽」、「呢個樣其實想點呢？」及「算吧啦仲出黎，本身個形象都插晒水，唔想再見到佢，”安心”留家啦唔該」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！