「點解嘅好打耳」《街頭魔法王》嫌唔夠衰 加埋陳凱琳！

好煩，真係好煩，而家每晚無論8點《愛回家‧八時入席》定係8點半《完美叛侶》都聽到吳若希嘅主題曲，直到10點半又嚟播佢嘅「成名作」《街頭魔法王》，單單係頭一集都聽到起碼廿次高分貝「點解嘅」，相信就連監製都覺得唔理好醜最緊要有迴響，哪怕係負面嘅迴響。呢輯街頭魔法王除咗有「點解嘅」，更搵嚟觀眾緣同樣麻麻的陳凱琳，雖然第一集佢未登場，但齋睇「點解嘅」都有唔少花生位。

1. 煩爆音貝

每次Louis完成一個魔術，佢例牌講「點解嘅」、「點解嘅」，有時更高分貝地話「Louis你好叻！點解你咁叻嘅？」、「咁快嘅？點解嘅？」，總之煩到你想熄電視。

2. 話人市儈

Louis問大家想變咩出嚟，大家都話想變錢，點知出名貪錢嘅佢(好似係，除非唔係)，竟然話人市儈，其實佢話人市儈，有說服力嗎？

3. 「姐姐」叫人姐姐

現場有位細細粒嘅年輕觀眾，年齡同佢相若又或細過佢，佢竟然話：「完美手機係我搵呀，唔係人地姐姐」，死都唔認老，就算人地老過你都畀啲啦！

4. 家燕姐都串佢「點解嘅」

第一集搵嚟家燕姐做嘉賓，一嚟到就串佢成日講「點解嘅」。結果當Louis玩完一連串魔術，家燕姐老練的驚訝反應，完美KO吳小姐，學下嘢呀唔該。

5. 扮可愛

短短半小時，廿幾歲人嘅吳小姐每分每秒都扮cute，嘟咀、跳舞轉圈、BB音，非常嘔心，真係想魔術嘅朋友自求多福。

相片來源：TVB.com網上截圖