【錄音】是按怎一定愛支持《國家語言發展法》？

是按怎欲揀這篇： 欲考驗語言ê程度，是uì日常生活中開始，「你敢講會出5枝指頭仔的名稱？」何教授用tsit个例來說明本土語言流失有偌嚴重，伊呼籲逐家支持《語發法》，增加本土語言相關ê工作機會，吸引人才投入，成做母語復振ê良性循環。 若講著台灣各族群母語的流失，大部份的人可能攏會講：有喔，有流失。毋過，到底流失有偌嚴重（giâm-tiōng），逐家可能就無真明顯的感受。佇遮舉兩个例，逐家嘛會當提來問身軀邊的人：「你敢講會出5支指頭仔的名稱？」（尤其是第2、第4支的名！）「你敢講會出『胰臟』的台語？」[註]……。前一站仔佇網路真時行「互相出10題台語名詞，按怎出才會當予對方袂曉」的遊戲（iû-hì）。若是去看in問的名詞，其實攏是真日常、真生活的──若是華語大概（tāi-khài）猶未讀小學的囡仔就攏知影矣，毋過換做台語，suah是考倒大部分人的困難題目。這猶是台語的情形喔，若換做客語、原住民族語，情形就koh-khah嚴重。 為著欲挽救台灣的本土語言，文化部鄭麗君部長一上台，就隨成立一个「國家語言發展科」，欲透過《國家語言發展法》的制訂，達成語言復振（ho̍k-tsín）的目的。 若是詳細閱讀文化部佇7月初公佈的《國家語言發展法》草案的內容，會當發現草案有兩个真重要的意義：宣示性的kap實質性的。 所謂宣示性的意義，就是宣示每一種國家語言攏總平等——過去佇國民政府的一元語言政策下面，干焦（kan-na）華語會當號做「國語」，其他的語言攏予人稱呼是「方言」。受著種種無平等的語言政策影響，台灣各族群的母語漸漸予社會大眾看做是「無水準」的語言。到tann，佇日常生活中咱猶原會當佇各種無仝的場合真簡單就發現這種現象的例。 《國家語言發展法》就是欲予台灣各族群的母語，攏成做是國家語言。這个法通過以後，相信像「正式場合愛講華語」、「正式文件愛用華語寫」按呢的觀念，攏會漸漸佇社會大眾的心內解禁，逐家慢慢會對家己的母語恢復（khue-ho̍k）信心——蔡總統稱呼用原住民語寫公文是「轉型正義上好的表現」就是這个道理。 佇實質性的意義方面，就是欲創造各國家語言使用者的工作機會——咱定講愛「尊重弱勢」。總是弱勢若是干焦「予人尊重」，in猶原無法度生存——因為in並無生存的基礎。所以咱若是欲解決社會上親像「予囡仔學母語，不如共時間提來學英語，未來khah有路用」，抑是「讀台灣語文（包括客家語文kap原住民語文）相關系所以後出業欲做啥」這類的質疑（tsit-gî），就愛予本土語言的使用者有對應的工作機會，按呢才會當吸引（khip-ín）koh-khah濟優秀（iu-siù）的人才願意投入國家語言的領域（líng-hi̍k）。一旦（it-tàn）優秀的人才願意投入，本土語言佇各方面的發展就會一直進步、一直發展，造成良性循環（sûn-khuân），按呢本土語言才真正會穩固（ún-kòo）。《國家語言發展法》草案的第二部分，就提供真濟相關工作機會的可能性，一旦通過，絕對會大大增加大眾投入本土語言的誘因（iú-in）。 《國家語言發展法》佇今年下半會期就會送入立法院，請關心本土語言復振的朋友，共同來支持這个法案，予伊會當順利通過。 讀予你聽 註：5支手指頭仔ê台語名憑頭排--落-來是「大頭拇」、「二指（jī-tsáinn）／指指（kí-tsáinn）」、「中指（tiong-tsáinn）」、「尾二指（bué-jī-tsáinn）／䆀指（bái-tsáinn）」、「尾指（bué-tsáinn）」；『胰臟』ê台語名是「腰尺（io-tshioh）」。 （作者是台中教育大學台灣語文學系副教授、台灣母語聯盟理事長；本文由台灣母語聯盟提供。） 註：本文使用教育部推薦漢字kap台羅。 延伸閱讀： 【錄音】Tio̍h緊通過〈國家語言發展法〉 【錄音】30年後台灣母語攏總死了了 文化部《國家語言發展法》草案（7月初3公告ê上新版） 專欄屬作者個人意見，文責歸屬作者，本報提供意見交流平台，不代表本報立場。