【台語世界／錄音】越頭症──語言政策ê母語後殖民現象

是按怎欲揀這篇： 少年人欲kā母語抾--轉-來，上好ê資源就是序大kap長輩，所以咱m̄-thang帶著「越頭症」，起大膽kā爸母話講--出-來，m̄管是原住民族語、客語ia̍h台語。無，若等到咱ê語言攏無--去--ah，koh越頭，咱ê文化只有加添心稀微。 「語碼（gí-bé）轉換」是指一種語言tsham別ê語言形成混合ê語碼，tī仝一ê對話中有意識teh交替使用ê語言，由一種語言轉換做另外一種語言。這種現象普遍存在tī世界上ê母語，有雙語ia̍h多語ê地區（非洲、印度）、移民地區（歐洲、美國）hām少數民族地區。Ah台灣是beh算tó一種--leh？咱ê「語碼轉換」是án-tsuánn ē變做一種症頭？ 若講台灣是殖民地區你kám ē同意？事實上台灣長期tī殖民政權下，施行錯誤ê母語教育，kā母語訂做方言、華語才是高貴ê語言。致使台灣人普遍講殖民者ê語言、無ài講家己ê語言。這款「後殖民（āu-si̍t-bîn）現象」是因為被貶抑（pī pián-ik）之下ê本土語hông tsinn kah無路用，民眾tuì母語失去信心，一般認為bē-hiáu母語無影響生活，就án-ne tài-tio̍h無意識ê「越頭症」，完全跳過文化價值ê層次。 啥物是「越頭症」？就是兩ê大人ê對話明明是用liú-lia̍h ê母語講，便若越頭tuì身邊ê囡仔、狗仔、生份人ia̍h是較少年--ê，就轉用華語講。像這款tī無意識ê「語碼轉換」中消滅家己ê母語ê現象，無論tī公園、車頭、夜市仔、餐廳、學校、菜市仔等公共場所，甚至家庭，不管時lóng看ē tio̍h。長輩這iân「越頭症」ê心理來自「講母語ē hông罰錢」ê驚惶，造成in心靈傷害，大部份失去母語自信、棄sak家己ê母語，致使「母語自殺」、「母語異化（ī-huà）」，若無即時治療「越頭症」，liâm-mi就會「母語死亡」--ah！Tse症頭就是因為「角色定位」無清楚，m̄知thang堅持家己ê主體性。Ah啥物是「角色定位」？若有人問：「你是啥物人？」你若講ē清楚主體性，án-ne就有「角色定位」ê概念--ah！ 聯合國教科文組織訂「世界母語日」kap《文化多樣性宣言》，就是宣示重視母語ê傳承kap得救。受虐症（siū-gi̍k-tsìng）ê「Stockholm（『斯德哥爾摩』）症候群（tsìng-hāu-kûn）」是咱tháu bē開ê死結。若出喙就講別人ê話，beh ná有家己ê文化？客家大老（tuā-ló）鍾肇政先生bat沉重講過：「客話若無--去，客家人就消失--ah！」咱m̄-thang pàng「越頭症」tī家己ê土地親手舞死家己ê母語！請長輩用你siōng gâu ê母語kap囝孫講話，mài講無標準ê華語，án-ne 才bē敗害囝孫ê頭殼。 英國歷史學家John Man tī伊ê著作（tù-tsok）《Alpha Beta》講「無具備讀寫能力就是落後（lo̍k-hōo）ê代名詞」。母語傳承ài文字化，咱ê囡仔ài ē-hiáu讀寫母語才保ē tiâu文化；文化是呈現歷史ê鏡頭，鏡頭展現族群根源脈絡（bi̍k-lo̍k）。母語呈現民族ê靈魂，親像提出「語言相對論（Linguistic relativity）」ê Edward Sapir hām Benjamin Whorf主張--ê：「無仝ê語言產生無仝ê思考方式」，所以人若無講母語，就ē漸漸失去伊族群ê文化。台灣人無講母語是因為phāinn歷史ê包袱仔陷入無知（bû-ti）ê「越頭症」，有體無魂親像稻草人，án-ne社會損失實在siunn大--lah！ 設使美國囡仔bē-hiáu講美國話、寫英文，你一定講無可能！ 設使日本囡仔bē-hiáu講日本話、寫日文，你一定講無可能！ 設使台灣囡仔bē-hiáu講台灣話、寫台文，你ê感想án-tsuánn--leh？ 讀予你聽： （作者是台灣羅馬字協會祕書長；本文由台灣羅馬字協會提供。） 註：本文使用教育部推薦漢字kap台羅，語音kap語意thang上教育部台灣閩南語常用辭典查詢。 延伸閱讀： 【台語世界／錄音】顧本土母語ài過5關──話頭 【台語世界／錄音】台語起鼓，台灣人起鼓 若欲投稿，請寄：binpotgb@gmail.com，文章字數 600-800。 請至【台語世界】閱讀更多相關文章。 專欄屬作者個人意見，本報純粹提供意見交流平台，不代表本報立場。