【台語世界／錄音】台語ê新皮囊

是按怎欲揀這篇： 台語若beh tuè ē著時代，tio̍h適應社會變遷、創造真濟新詞。為著新詞ê流通，tsiânn需要政府鬥出力，制定一致化ê規範。Tann，原住民族語相關ê新詞研究已經起行，lán mā應該繼續監督政府，要求政府照顧其他本土語言，維護台灣珍貴ê語言資源。 Tsit-tsām-á網路面頂時行一个華語詞『網紅』，意思是網路頂足tshìng ê人。逐不時有人leh問講，tsit个詞ê台語按怎講？有台語ê學者回應講，ē-sái講做「網星」、「網tshìng」； mā有網友講，ē-tàng直接照華語講做「網紅（bāng-hông）」。窮實（khîng-si̍t）像tsit khuán ê討論kài tsia̍p。譬論講，用手機仔家己翕相leh用ê『自拍神器』、『藍牙』、『裸體電池』……，lóng有人會討論tsia-ê詞台語beh按怎講。 Tuè時代、社會文明ê演變，有真濟新ê物件hông創造--出-來，án-ne tō生真濟新ê語詞。特別是tsit-má網路tsiânn發達，咱接觸新ê物件足kín--ê，見若一个新詞出--來，咱suî知影華語按怎講，m̄-koh台語ê講法--leh？Tiānn-tiānn是「滿天全金條，beh sa無半條」，hue-sà-sà。若無，tō是逐家討論規晡，雖bóng mā有一寡適當ê台語詞thang好用，總--是he kám是逐家ê共識？後擺咱lóng照he講？抑是一tīn人tī家己ê khoo-á內leh講--ê niâ？ 咱日常生活mā有tsiânn濟用品m̄知台語按怎講，像我kài tsia̍p hōo朋友問『卸妝乳』、『遙控器』、『迴紋針』、『玻尿酸』……ê台語。Koh像tsit-má街仔三步一間賣涼水--ê，hia-ê涼--ê ê名beh按怎講？若是你家己講一khuán，去店頭kâng買，人kám聽有你beh買siánn？ M̄-thang想講tsit khuán現象無sánn，想講「bē曉用台語講，kōo華語講tō好」；若是án-ne ê心態，kám是後--來ê台語詞tō lóng是華語？Suà--lo̍h，新詞台語oh講，人tō bē愛講；無講，tō bē曉講。Koh來，對教學者、編教材--ê，甚至認證ê時，對新語詞ê講法beh掠siáng ê講法做標準？Tse是一項tsiânn嚴肅koh真要緊ê問題，自早tō有人想--tio̍h leh反應--ah。面對tsit khuán ê困境，當然是台語iáu無受tio̍h「國家語言」地位對待所造成--ê。 政府iáu做無到ê sî-tsūn，咱tiānn-tio̍h ài變竅。Tann真歡喜網路頂有一tīn人，起造一个平台「iTaigi」，m̄-nā kā舊底ê語詞抾--起-來，逐家koh ē-tàng激頭腦提供新詞ê講法，囥tī tsit个平台hōo逐家參考，看tó一khuán講法khah sù-sī。俗語講：「Tsit溪無魚別溪釣。」總--是咱tiānn-tio̍h ài繼續催迫政府，kā tsit个責任擔--起-來tsiah ē-sái--tsit。 語言是活--ê，社會leh變，台語用ê語詞mā ài tuè會tio̍h社會變化ê跤步；若無，久--來會變死性，tsit khuán ê語言是無性命力--ê。咱beh ài--ê是有性命力ê台語，án-ne tsiah有才調活--落-去。 讀予你聽： （作者是成大台灣語文測驗中心專員；本文由成大台灣語文測驗中心提供。） 註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。 請參照【傳統白話字版】 延伸閱讀： 「iTaigi愛台語」平台，請參考伊ê使用說明、面冊專頁 【台語世界／錄音】新台灣話陳列館 原住民族語言發展中心 若欲投稿，請寄：binpotgb@gmail.com，文章字數 600-800；文章若採用，有淡薄仔稿費。 請上【台語世界】閱讀閣較濟相關文章。 專欄屬作者個人意見，文責歸屬作者，本報提供意見交流平台，不代表本報立場。