【台語世界／錄音】你會曉台語？—完整ê語言能力包含「聽、講、讀、寫」

是按怎欲揀這篇： 濟濟人感覺本土語言無需要家己ê文字、無需要讀寫、無需要教學，nā án-ne是按怎英語ia̍h其他ê語言tio̍h-ài？話講透機，tse tio̍h是有看bē著ê歧視tī-teh。Kám欲學本土語言ē-tàng是個人選擇，m̄-koh歧視就千萬bē用--tit。 你kám會曉台語？ 台灣人lóng會曉台語？ 台灣人lóng會曉家己ê母語？ 咱來想看māi：若是有人kā你講伊會曉英語，意思是sím-mi̍h？無人會hiau疑，就是會曉聽、會曉講、會曉讀，koh會曉寫！Tio̍h--無？完整ê語言能力包含「聽、講、讀、寫」四項。M̄-kú台灣人kám lóng會曉聽、講、讀、寫伊家己ê母語？答案足清楚：m̄是！台灣人ê母語能力極加是聽kap講兩項nā-tiānn。會當講kan-ta 50分，無及格！而且講了走音抑是m̄-tio̍h mā無稀罕，所以是無夠50分。你若較ke-pô beh kā糾正，上捷拄--tio̍h ê反應是「聽有tio̍h好--啦！」這款心態表示sím-mi̍h？應該是看輕家己ê母語，mā對家己真無自信kap尊重。 咱學英語ê態度是啥款？Kám m̄是發音ài足準、意思ài了解，koh ài會曉寫到真正確？是啥代咱對家己ê母語按呢tshìn-tshìn-tshái-tshái「聽有tio̍h好--啦」？Sóo-pái咱應該kā咱ê母語看做kap英語仝款要緊才tio̍h！ 其實台灣人bē看重家己ê母語，上大ê原因真簡單：長期hōo人殖民統治，咱ê語言文化hōo人蹧躂、打壓kap phì-siùnn！學校不但無教，koh對講母語ê人公開侮辱kap處罰！年久月深，咱suah mā認定家己ê語言文化是粗魯無路用--ê！Sóo-pái感覺無需要kā看重，m̄免正確學習，橫直tshìn-tshái「聽有tio̍h好--啦！」 台灣國ê鄉親--ah，咱若對家己ê語言文化無趣味、無自信、無beh要意，按呢ná有可能建立民主、文明koh多元ê台灣國--leh？咱應該來讀kap寫家己ê母語，不管是beh用sím-mi̍h文字寫lóng總好。就是咱ài kā台語抑是母語看做英語按呢來處理：會曉「聽、講、讀、寫」！ 語言若無--去，文化mā tuè leh消失；按呢ê台灣就m̄是咱熟似ê台灣，這kám是咱ê向望？咱絕對ài用食奶á力kā台語kap母語救--轉-來。Hōo成做台灣文化ê主流。按呢咱台灣人ê文化特色才會當保存kap流傳、生湠。按呢咱祖先kap咱過去ê拍拚才有意義！ 感謝！勞力！Malimali masalu（註一）！ 讀予你聽： （作者是台灣羅馬字協會創會理事長、高雄醫學大學「醫用台語」課程講師；本文由台灣羅馬字協會 提供。） 註一：這是Paiwan（排灣）語ê「感謝」。 註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。 請參照【傳統白話字版】 延伸閱讀： 【台語世界／錄音】你台語認證--ah buē？ 【專文】評論徐佳青荒謬的母語觀 若欲投稿，請寄：binpotgb@gmail.com，文章字數 600-800。 請至【台語世界】閱讀更多相關文章。 專欄屬作者個人意見，本報純粹提供意見交流平台，不代表本報立場。