【Bookmark定】全台特色民宿/露營區 享隔世寧靜之旅

新冠肺炎於本地又爆發新一波疫情，大家唔使諗住可能好快解封可以去旅行，照計應該都遙遙無期喇。正如好多專家所言，他日就算旅行業「復活」，好多人都未必再會如常咁去大城市，可能都喜歡避開人潮，與世隔絕走進郊外，今日就介紹台灣3大位處偏遠地區但自成一閣嘅民宿/露宿區，大家一定要Bookmark定，他日可以再出發的話，保證係絕佳隔世地！

最新開幕 苗栗鄉村小屋

全台灣最新開幕露營住宿地區就係位於苗栗嘅「綠意山莊」，地點就近熱門景點飛牛牧場及三義。綠意山莊包括露營區、小木屋住宿區、餐廳、哈比人之家等景點，處於鄉郊之中被翠綠包圍，山莊中有各式各樣打卡靚位，例如歐式風車、日式鳥居。住宿方面一定要入住其泡泡屋，係一個個搭好嘅半透明帳篷，一到夜晚抬頭一看就會見到滿天星星呢！

地址：苗栗苑裡鎮9鄰96-5號

預訂：按這裡

南投隱世民宿 無印式獨立屋私隱度極高

去台灣住民宿，好多人都無乜特別寄望，不過當大家見過呢間位於南投隱世民宿，可能就會改觀。民宿名為「八番私人住宅」，為純白色3層高獨立屋，雖然位處深山之中，不過自成一閣，有山有湖仲有一大片草原。獨立屋內籠用上「無印」式設計，以原木及白色作為主調，每層都有露台，每逢4、5月仲有螢火蟲呢！其中一定要提，係入面嘅餐廳提供全日式美食，例如日式水信玄餅、令人尤如置身於日本！

地址：南投魚池鄉中山路270巷8號

預訂：按這裡

澎湖豪宅式民宿 非一般渡假體驗

目前台灣另一間話題民宿，就係澎湖西南岸呢一間「那。故事水岸莊園民宿」，外型已經極具現代感，彎彎曲曲嘅落地玻璃，令民宿遠睇尤如珊瑚一樣，本身民宿每房都望無敵海景，而外面更有特大泳池及哥爾夫球場，有水上鞦韆等打卡靚位。至於民宿5種房型都設計精美，有落地玻璃睇海景，又有露台可以攤住睇日落。頂樓最有特色，擁有玻璃天窗，躺於床上可以望星空美景！平日只要租住兩晚或以上，更可免費租用甲蟲車畀你自駕遊澎湖呢。

地址：澎湖馬公市井垵里井子垵100號

預訂：按這裡