港姐港男一定被力捧？撈唔起10年後港姐港男冠軍逐個睇

好多人認為參選港姐、港男係捷徑入娛樂圈，又以為個個都可以好似佘詩曼、陳凱琳、蔡思貝咁即刻畀無綫力捧。不過世事邊有咁完美呀？好多人參選完都可以唔見咗影㗎！以下呢幾位10年後嘅港姐同港男冠軍就係例子！

張名雅
2012年港姐冠軍張名雅同時獲國際親善小姐以及現場最受歡迎佳麗大獎，可惜由2014年到依家雖然都參與過一啲受歡迎劇集，好似《以和為貴》、《鬼同你OT》、《一屋老友記》等等，不過做極都係二、三線或者客串角色。反觀同屆嘅亞軍黃心穎同季軍嘅朱千雪，一個做宅男女神，一個仲擔正做埋「女一」添！

陳庭欣
身為2010年港姐冠軍嘅陳庭欣到而家都係無咩代表作，大部份嘅工作都係做下司儀。不過對佢來講應該唔係問題，因為有傳佢已經釣到現年40歲嘅大律師金龜，唔通仲同你通宵捱夜拍劇咩？

邵珮詩
雖然係2014年「大滿貫港姐」冠軍，觀眾緣應該唔錯。最近被無綫安排咗佢喺《 愛·回家之八時入席 》演出，但就被網民狠批佢雞仔聲超煩。你話佢資歷尚淺？咁就要望下只不過係多佢一年資歷嘅陳凱琳啦； 雖然同樣經常被網民狠批演技差兼且把聲煩厭，不過仍然做女一，俾公司力捧。呢啲未就係同人唔同命囉！

李晉強
大家唔記得李晉強係邊個？同大家介紹返，其實佢係2011年港男冠軍，曾經參演過，《老表，你好嘢！》 、《衝上雲霄II》、《名門暗戰》、《張保仔》、《一屋老友記》 等重頭劇，不過全部都係做茄喱啡…….介紹完。

翟威廉
2010年香港先生選舉八料冠軍翟威廉，其實亦係2005年亞洲先生亞軍。佢出道咗差唔多10年，到而家雖然你都應該叫得出佢個名。不過講到代表作佢都有一套，就係同陳庭欣嘅緋聞。