Yahoo奇摩新聞 做真·男人 7個必需戒甩的幼稚陋習
講到擇偶條件，好多女士都認同男士逾成熟就逾有吸引力，所以話男人只要保養得好加上有內涵嘅話，就算去到40歲都依然可以有市場，唔怕無女士喜歡。
但係要令女士對您加分嘅話，其實就有至少7個陋習一定要戒甩左先得，如果唔係就算係外表幾咁光鮮呃到下人，相處落人地就自然發現你同個廿歲嘅o靚仔無咩分別，令您喺佢地嘅心目中地位降低。
做真·男人 7個必需戒甩的幼稚陋習
1.認叻
有啲人會因為自己喺網上面耳濡目染聽到嘅傳言，就當成真嘅一樣將自己當成為博學多才，醫學、文學、工程系博士一樣，一聽到人講類似嘅話題就挑戰權威，忍唔住要更正人地，就算係自己心儀嘅對象都忍唔到。成日下下都要喺人地面前認叻，唔識得以平等嘅角度同人溝通，咁只係會令人覺得你好扮野，並唔會令人覺得你有內涵。
2. 無安全感又好勝
有啲人會因為自己無咩自信，就好鐘意踩底其他人嚟抬高自己，等自己「感覺良好」一啲。同埋為左建立自己嘅威信，有啲人同時間都係好鬼好勝，就算係爭條無人要嘅爛紙都一定要贏，為嘅就只係唔想喺自己女人面前無面。更甚嘅係有啲人仲會覺得自己係男人就大晒，女人一定要聽聽話話先至啱。其實咁樣做，只不過會突顯出嗰一個人係非常唔成熟呢個缺點，正常人有贏就一定有輸，能夠放得低先至係大丈夫。
3. 唔識同人溝通
要認真看待一段感情，最重要係識得同另一半溝通，唔係收埋唔講，或者係無視對方嘅要求。坦白同對方講清楚自己嘅感受，而唔係等對方講左你先至講。另外，如果你對另一半提出嘅建議唔認同，亦都應該照直講出自己感受，咁先至係互相尊重嘅做法，亦都係代表你已經成長，唔再好似小朋友咁唔識解決二人間出現嘅問題。
4. 只著重外表
人鐘意靚嘅野雖然係好正常，但如果呢種嘅想法超越左現實，例如經常幻想自己嘅另一半將會好似雜誌模特兒一樣咁靚，咁就係一種非常愚蠢嘅妄想。要成為成熟嘅男性，第一樣要明白嘅就係要知道美麗並唔單止係外表一項，而係由性格、為人等一齊組成。如果對象係好靚但有惡毒心腸，咁得到手又代表到啲咩呢？
5. 容易受朋輩影響
如果一個人無自己嘅主見，佢就只會係一個隨波逐流嘅「無面人」，同其他嘅路人無咩分別，可以隨便搵人嚟替代。除此以外，有啲人習慣有咩都問左兄弟先，兄弟講咩佢地都受先認同左先，而唔諗下自己心底裡究竟有咩睇法。如果係一個成熟嘅人，其實對於每一樣事物，自己總會有一個見解，而且亦都識得為自己嘅決定辯護同埋理論，而並唔係認同左人地嘅想法埋沒自己嘅想法。
6. 唔識渣定主意
如果去到某個年齡層做人仍然係優柔寡斷，唔識得渣定主意為自己目標、工作，感情作出決定，咁即係意味左佢地並唔識得衡量事物輕重。亦因為做人無目標，好多決策都會係要求就手就算，並唔知道自己究竟係想要一個點樣嘅另一半，有人陪自己就算，其實咁樣做只會代表你唔識得尊重對方，當對方係一樣滿足情慾嘅工具就算。
7. 唔為將來作打算
（圖片來源：Blogspot）
人存在嘅目的，其實係由自己所掌控，需要為自己定下目標努力奮鬥下去。無論係喺工作、財政、感情、家庭、個人方面，其實都應該要有住一個目標，而且更唔應該只考慮到自己一個，仲要包括身邊受到影響嘅人，例如家人以及另一半。所以如果佢地對未來全無打算，咁就意味左佢思想並未成熟，只係識得玩樂而並無危機感。
圖片來源：Tumblr
【原文連結】
做真·男人 7個必需戒甩的幼稚陋習
