COLLAR生日會名額先到先得 粉絲凌晨排隊不滿安排

ViuTV選秀真人騷《全民造星IV》造就女團COLLAR，於2022年1月12日萬眾期待下正式出道，同日發布首支派台歌《Call My Name!》；今年團隊踏入2周年，MakerVille日前宣布COLLAR於今日（12日）海港城海運大廈展覽大堂舉行「COLLAR 2週年生日會」，不過當時詳細細節遲遲未有公布，令網民相當鼓燥。

COLLAR於今日（12日）舉行「COLLAR 2週年生日會」，生日會於下午2時開始，其後隨即舉行簽名會，設簽名及互動環節，與粉絲共同見證COLLAR嘅蛻變。起初，大會未有宣布更多細節，令網民不滿點解咁遲都未宣布：「4日前先公布有活動，但活動詳情2日前先講」、「少過48小時都未公布詳情，佢真係expect人星期四先黎諗請唔請假」、「佢諗住無details大家都會請假啫」、「笑死，人地AM Team打份工，對collar唔洗有愛，對你地更加係，人地隨時收咗工去追隔離團」、「無奈依間公司啲手法同部署真係令人心寒，追星都係想開心啫」等等。大會之後宣布排隊安排，表示當日首400名粉絲可獲COLLAR親筆簽名及2週年限定POSTCARD，名額先到先得；COLLAR 2週年生日會安排被指臨急抱佛腳，加上有網民將IG Cap圖上載至《造星評議會 - 全民造星討論區》專區，又貼出TG群組嘅對話，指大會將在早上7時半天星碼頭附近派籌予頭200名粉絲，領籌過後可以休息，待中午2時見COLLAR，與大會所公布嘅400個名額唔相同，網民就寫道：「即係201～400唔係人，唔需要休息；AM team成日下晝先開工，不如改名做PM team算啦」，疑似暗嘲COLLAR嘅AM team效率低，以及另外200個名額排隊安排不當。

12日凌晨12時左右，已有唔少網民喺討論區分享排隊情況，有網民留言指接到在場保安最新通知，指籌號增至250個，其他籌號視情況而定，7時45分會喺天星碼頭向已排隊人士派籌，派籌之後會分組按排隊次序進入Fans Area；不過就指排隊人士已去到200人，叫去緊嗰啲可以返屋企。對於排隊安排，好多網民表示唔滿意：「不如佢直接而家派250個籌，比班人返屋企先啦，鄧（戥）佢地慘」、「講真佢而家派籌啦，比大家返屋企，我只係想班女唔駛擔心粉絲安全，簽名見面呢啲隨緣」、「am team 嘆緊暖氣，唔會出黎派籌」、「照咁睇實亂到七彩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！