Do姐鄭裕玲落實拍HOY TV旅遊節目 仲有5位型男陪出埠 網民：陣容好吸引呀

曾貴為「TVB鎮台之寶」嘅鄭裕玲（Do姐），喺上年10月承認與無綫結束44年賓主關係。回復自由身嘅Do姐早前宣布與為HOY TV合作拍攝旅遊節目，去到噚日（16日）佢仲喺IG宣布拍檔陣容。

鄭裕玲（Do姐）喺IG上載影片宣布即將出發拍攝旅遊節目，留言話：「#Do姐旅遊節目#Do姐出埠終於有得飛啦，戥唔戥我高興呢？再高興D都仲有啊～～今次旅遊節目我邀請左⋯哈哈」喺影片中，Do姐先大賣關子，未有講到會去邊度拍攝，不過佢就公佈咗5位將會同佢出發嘅後生男藝人，男神們包括洪嘉豪、林家謙、細貓應智越、Jeffrey魏浚笙及Tyson Yoshi。

唔少網民知道呢個「陪玩」陣容之後，紛紛留言表示期待，例如「好期待林家謙同Do姐 兩個處女座會幾處女座」、「嘉豪 家謙 TY Jeffrey。呢幾個組合 真係無得輸」、「期待家謙 TY 想像唔到佢上旅行綜藝」、「細貓，應該幾有新鮮感 Tyson 就傻豬豬咁應該幾好笑」、「好彩嘉賓名單係最新偶像靚仔，如果再搵農夫6號變咗搵鬼同你睇」、「嘩，有Tyson ＆ Terence 真係好正，好期待呀」及「陣容好吸引呀」等等。

另外，亦有網民期待《Do姐ERROR遊》，好想Do姐可以同ERROR出外拍攝旅遊節目，留言話「Do姐，幾時同error嗰4隻企鵝飛呀？一定笑到癲」、「個個都串咀嘅，加埋193就perfect」及「193好睇啲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！