【台語世界／錄音】Kan-tann客家ē-sái放火？

是按怎欲揀這篇： 台灣語言ê轉型正義若講透機，猶原tio̍h-ài處理族群和解ê議題。若認同台灣tsit塊土地是lán共同ê家園，beh按怎用「包容kap諒解」替換「歧視kap侮辱」，來開破本土語言發展ê窘迫、tshiau揣互相倚傍ê未來，就是lán共同ê課題。 最近客家委員會發佈標題『媒體輕蔑稱「客人仔」 客委會表達強烈抗議』ê新聞稿，批評蘋果日報動新聞「『咩姊』台語新聞」kā「客人」號做「客人仔」。咱主張mā支持族群平等、無應該用言語侮辱他族。M̄-koh，客家委員會新聞稿內底用「福老語」來稱呼台語。「福老」mā是侮辱用語neh！是按怎客家委員會反對人用侮辱用語，家己suah有特權ē-sái侮辱他族？ 依據台灣總督府tī 1931年出版ê《台日大辭典》，所謂Hô-ló（福佬）是指廣東人對福建人ê歧視稱呼。「福佬」ia̍h是「福老」lóng源自Hoklo一詞。依據美國傳教士S. Wells Williams tī 1874年出版ê《漢英韻府》hām Kennelly tī 1908年編譯ê《中國坤輿詳誌》記載，Hoklo一詞是廣東本地人對廣東東部潮汕地區ê人ê稱呼。Hoklo後來hông用漢字寫成「學老」、「福狫」、「福佬」、「福老」ia̍h是「河洛」等無仝字。 台灣ê客家族群多數源自廣東ê四縣hām海陸。In tī廣東當地tuè廣東人稱呼潮汕地區ê人做「Hoklo-ngin」（寫做「福佬人」、「福老人」ia̍h是「河洛人」）。當客人遷徙來台灣liáu in繼續用這个講法來稱呼講台語ê族群。對台語族群來講，in認同台灣這塊土地做台灣人，in聽tio̍h人講伊是福老ia̍h河洛當然mā感覺受侮辱！ 袂少客家朋友慣勢用「福老」ia̍h是「閩南」來稱呼台語族群。In ē解說講he無侮辱ê意思，是慣勢用語niâ。若án-ne，台語族群mā ē-sái講「客人仔」無歹意，mā是慣勢用語niâ啊！根據東漢許慎《說文解字》hām清代段玉裁《說文解字注》ê解說，閩南ê「閩」字是蛇種、野蠻民族ê意思！Án-ne kám講無歧視ê意涵？ 咱支持立《族群平等法》！M̄-koh，tio̍h「講ē到，做ē到」，ài真正做到族群平等！Bē-sái像目前án-ne，有客家委員會、原住民族委員會，suah無台語委員會；有客家電視台、原住民電視台，suah無台語電視台。Tse kám毋是teh歧視台語族群！？ 讀予你聽： （作者是台灣羅馬字協會會員；本文由台灣羅馬字協會提供。） 註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。 延伸閱讀： ・閩客心結由來已久，大家都需要學習包容與諒解（Ang Uijin面冊） ・《族群平等法》該制定了──「客人仔」新聞事件的省思 ・媒體輕蔑稱「客人仔」 客委會表達強烈抗議（客委會） 若欲投稿，請寄：binpotgb@gmail.com，文章字數 600-800；文章若採用，有淡薄仔稿費。 請上【台語世界】閱讀閣較濟相關文章。 專欄屬作者個人意見，文責歸屬作者，本報提供意見交流平台，不代表本報立場。