【台語世界／錄音】多元語文佇台灣，m̄免痟外語

是按怎欲揀這篇： 學一種新ê語言、培養多語文ê能力，來吸收濟濟ê智識，兼訓練家己ê頭腦，其實無tiānn-tio̍h ài去追求外國語。台灣ê多元語言環境，是lán上珍貴ê寶藏；beh了解在地ê故事、傳承家鄉ê記持、粒積lán人ê文化，就uì學本土語言開始。 Thong人知，多元語文ê社會環境有創新、創意kap競爭ê優勢，政治人物較戇mā知影tuè人huah。M̄-koh講著beh學多元語文ê時，tsia-ê政治人物suî跳過本土母語，直接去tshînn倚外國語，若像m̄知有本土語言ê存在。 過去本土語言內底ê客語、台語lóng hông看做是漢語下跤ê方言，hông認為kē人一級；其實，客語、台語lóng m̄是「中國話」ê方言。Koh再講，語言無分懸低，語言學理kap《世界語言權宣言》lóng強調語言是平等--ê，bē-sái有歧視。咱若輕視別人ê語言已經無應該，tsit-má suah連ka-tī ê母語to輕視。 台灣有二十種以上ê本土語言，beh講多元語文，本身tō有夠額ê語言來tsiânn。有外國語beh來參與是kài好，m̄-koh咱佇這塊土地徛起，beh學本土語言ê成本，其實比外國語較kē；咱ê本土語言tsit-má看--起-來「離離落落」，是因為過去hōo殖民政權打壓所致。咱若kā所有ê本土語言lóng救--轉-來，你想，免講學習本貴som-som ê外語，咱身軀邊tō有二十幾種語言thang學。 若koh thang把握囡仔學語言ê時機，咱ê囡仔佇七歲進前會曉兩三種本土語言並無困難；有學語言ê經驗做基礎，另工beh學英語、日語等外語ke真簡單。若koh加添華語，咱ê囡仔小學畢業進前bat四五種語言，檢采是真平常ê tāi-tsì；án-ne咱ê社會自然tsiânn做多元語文ê環境。知影thang學本土語言tō有這款贏面，可惜真tsē台灣人痟外語，顛倒斬斷囡仔學本土語言ê機會，連外國語mā學袂好勢。 講--起-來，筆者認為過去ê國民黨對語言是內行，所以in知影beh àn tó位拍死本土語言，一下拍tō著。咱ê母語hông打壓了後，一寡台灣人m̄知beh kā公道討--轉-來，顛倒tsiânn做打壓母語ê拍手。有人hōo in牽--去，tuè in設ê路liù-liù行，較thang承著肉iù仔；m̄-koh大部份台灣人suah tsiânn做弱勢，辛苦過日。 民進黨對語言是外行，號稱本土政黨，tsit-má完全執政，suah m̄知去救本土語言。翻頭想，2008年國民黨政府tú上台，未到三個月tō kā「台灣閩南語」改做「閩南語」，koh kā beh辦台語認證ê 4,000萬預算thâi kah bô半角；民進黨執政一冬半，suah連這款困境to無kā拍--破，台灣ê本土語言復振猶有啥thang ǹg-bāng？ 讀予你聽： （作者是台灣羅馬字協會理事；本文由台灣羅馬字協會提供。） 註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢 請參照【傳統白話字版】 延伸閱讀： ・【台語世界／錄音】Tio̍h緊通過〈國家語言發展法〉 ・【台語世界／錄音】你所無了解ê本土語言人權 ・【台語世界／錄音】法國、越南kap韓國對語言運動者ê啟示（上） 若欲投稿，請寄：binpotgb@gmail.com，文章字數 600-800；文章若採用，有淡薄仔稿費。 請上【台語世界】閱讀閣較濟相關文章。 專欄屬作者個人意見，文責歸屬作者，本報提供意見交流平台，不代表本報立場。