MIRROR新歌《WE ALL ARE》 未出街就有爭議 被指參考BTS舊作？

自從7月紅館演唱會事故，導致3名舞者受傷之後，MIRROR休團2個月，至今個月先至「復出」。早前有傳MIRROR已經準備好團歌喺11月推出，殊不知尋晚突然宣布新歌WE ALL ARE今日中午首播。

經歷2個幾月「沒有鏡仔的日子」，fans當然十分期待。不過有網民認為，WE ALL ARE嘅宣傳照，風格同韓國天團BTS之前嘅宣傳照十分接近。

造型上，MIRROR成員穿著暖色系服裝，同BTS 2年前一個電動車廣告照嘅打扮好類似。而背景嘅台階式佈置、拱門以及藍天白雲構圖，就同BTS為美國NBC電視台節目TODAY Citi Music Series製作嘅特別版MV佈景接近。只不過BTS嘅MV佈景入面，營造嘅「海景」喺後面，而MIRROR宣傳照就喺前面有個水池。

當然有唔少網友唔認同，有人認為呢種風格日韓男團常用，例如另一韓團EXO 2018年嘅專輯COUNTDOWN封面都係呢種階梯佈景，甚至連早前ViuTV口罩小姐嘅宣傳片都係用類似拱門＋水池構圖，所以冇咩唔妥。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！