【日本酒店】$800內就住到！新開業3大福岡酒店比併

去日本，大家可能第一時間諗東京；但其實近年唔少人都識玩，轉去九州，可以自駕遊，地區大又少啲遊客，可以話最適合情侶及家庭。福岡屬於日本南部第一大城市，發展非常迅速，旅遊業都十分繁榮，尤其酒店更加一家比一家好。今日為大家介紹3大新開業酒店，睇下邊間啱你心水！

2019年1月開業：機械恐龍做職員

住酒店除咗舒適方便之外，仲有咩條件？呢間福岡海茵娜酒店就為大家提供多一個元素，就係可以打卡！酒店最大賣點係用上機械速龍作為接待員，住客入住、登記、退房都係依靠機械速龍，玩味十足！至於房間方面，算比一般日本酒店空間大，而且酒店房設施都電子化，例如電子衣櫃等。

舒適度：****（以5星為滿分）

酒店空間唔算細，絕非一般日本Budget酒店格局，而最大賣點係浴室、廁所分開兩間，可以話係難得一見嘅衛生、方便。

設施：***

酒店設施就唔算多，只有飯堂Canteen。不過房間設施有齊電子衣櫃，可乾衣兼殺菌。

抵住度：*****

咁新嘅酒店，又有機械恐龍做賣點，一晚連稅只需$500幾港元，可以話超值，酒店位置都好好，好近Donki等大超市。

海茵娜酒店

地址：福岡県福岡市博多区中洲5丁目4番19号

預訂：按這裡

2019年6月開業：博多站旁邊

博多係福岡市中心，不過博多站旁酒店通常係大牌子名牌酒店，酒店都比較貴；不過呢間6月開嘅博多站旁嘅VIA INN就係平價版。最大賣點當然係地點超方便，鄰近多個大型商場、地下街、商店街、夜晚又可去屋台。酒店房就唔算大，140呎，雙人房就161呎，典型小酒店，不過又新又近博多，可以話別無他選。

舒適度：***

雖然屬於經濟型酒店，不過酒店新淨衛生，於眾多酒店評價網站中，衛生分數都高達95%以上，服務亦一流！

設施：***

酒店同好多日本Budget酒店一樣無乜設施可言，只有基本飯堂。房間設施都係基本風筒、雪櫃等。

抵住度：****

作為咁方便位置及咁新酒店，雙人房每晚連稅都係$700幾蚊，算係同類酒店最抵！

Via Inn博多站

地址：福岡県福岡市博多区博多駅前2丁目17-11

預訂：按這裡

2019年6月開業：頂層天台大浴場

日本酒店名牌之一就係三井花園，呢間於6月底先於福岡祇園開幕嘅新酒店就係旗下最新分店。酒店一如各地分店一樣，設有大浴場，而且仲係天台露天溫泉！酒店多以2人房為主，面積都比一般酒店大，2人房約200呎。酒店位置於祇園，但其實都可以行到去博多，附近亦有24小時便利店及大型百貨公司，地點一流！

舒適度：****

酒店唔係一般蚊型酒店，房間唔細，而且設計係日式摩登風格，6月底先開又新淨，舒適度無容置疑。

設施：*****

日本溫泉酒店好多人都好鍾意，不過喺市中心嘅酒店就少有溫泉設施；呢間酒店位置方便又有溫泉，超正！

抵住度：*****

酒店又新又方便，仲有溫泉，價錢都係每晚連稅$700幾，其實非常抵！

三井花園酒店福岡祇園

地址：福岡市博多区博多駅前2-8-15

預訂：按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！