細數大台中永遠只能夠做喜劇嘅男主角

大台《完美叛侶》終於去到大結局，呢套一開始就被視為搶救大台收視嘅重頭劇成績麻麻，無乜正評。其中擔正嘅陳豪，飾演香港最Top大狀，極為嚴肅，而且每一分鐘都充滿計算同心計，甚至連老婆邵美琪都唔信。不過陳豪演技就被批評唔識做戲，千篇一律嘅表情同語氣，好似對上一套《潮流教主》咁，又係扮演港版老佛爺，認真起嚟偏偏觀眾睇落就唔知點解會笑！無辦法，陳豪其實根本係一個喜劇演員，喜感十足！你睇之前《鬼同你OT》、《公主嫁到》等都係演傻呼呼嘅憨直角色，觀眾反而非常受落。所以麻煩大台，唔好再叫佢做啲嚴肅角色喇，簡直係資源錯配。細數陳豪以外，以下幾位只適合做喜劇嘅男主角啦！

李思捷

「福祿壽」之一嘅李思捷除咗主持之外，近年都保持一年一劇，嚟緊又有一套《爸B有話兒》。不過佢都知道自己戲路，所以一直都走喜劇路線，通常都以冷面笑匠形象登場。之前偶然做過下認真角色，例如《天天天晴》等，反而完全突出唔到個人性格。

郭晉安

以前，唔算靚仔又無乜個人特色嘅郭晉安一直都浮浮沉沉上唔到男一，直至《憨夫成龍》中飾演阿旺之後，正式坐上男一之位，更三奪視帝，不過留意，自從佢做完阿旺之後，就算做幾多認真角色，都擺脫唔到「阿旺」陣味，然後終於喺前年《老表你好嘢！》系列，再扮搞笑角色，結果成績比任何認真角色都要好。

王浩信

近年力捧新上位男一，王浩信初初彈起做男一嘅劇係《樓奴》，當中表現非常有喜劇感，十分成功，繼後《EU超時任務》更扮演圍村佬「渠頭」，同樣得到大量正評。偏偏要佢做返警察、廉署嘅角色咩，反而覺得格格不入，空空浪費其高大靚仔嘅外表！不過總算搵到自己條路，前途無限。