親證最後一個棟篤笑 子華神經典金句重溫

萬眾期待嘅黃子華棟篤笑喺暑假終於返黎啦！相信好多人都知道今次show名叫做《金盤啷口》，當時就已經有人推斷今次會係佢最後一次做棟篤笑，不過一路都無人證實消息。直至前日，子華終於喺Facebook錄咗一段片段，向大家正式宣布今次會係佢最後一個棟篤笑。亦由於今次Show嘅主題都係只係同香港有關，所以不設巡迴演出。所以如果各位想再次一睹子華神奇棟篤笑風采，今次就真係要把握機會啦！

黃子華由1990年開始做棟篤笑，由第一個Show《娛樂圈血肉史》（1990）、之後去到《色情家庭》（1991）、《跟住去邊度》（1992）、《末世財神》（1994）、《棟篤笑雙打之玩無可玩》（1995）、《秋前算賬》（1997）、《鬚根Show》（1998）、《拾下拾下拾年棟篤笑》（1999）、《鬚根Show2》（2000）、《冇炭用》（2003）、《兒童不宜》（2006）、《越大鑊越快樂》（2007）、《嘩眾取寵》（2009）、《娛樂圈血肉史2》（2010）、《洗燥》（2012）、《唔黐線 唔正常》（2014）全部都道出咗香港人、打工仔、男女朋友嘅心聲。而且佢善於利用笑話去演繹各種哲學，令人越聽越明白人生嘅道理。

經過呢225場之多嘅棟篤笑，子華亦留下咗唔少金句俾大家，趁住呢個機會同大家再次回味啦！

「香港嘅精神，就係『冇精神』。」

「我覺得講得出『我好鍾意返工』呢句說話既人，一定係鬼上身。」

「阿媽標仔參，誰來俾贖金？」

「倒抽一口涼氣，係我細個睇武俠小說先睇到呢啲字眼，通常係中咗毒嘅人先會咁講，佢忽然瞓醒，見到有隻西域蜘蛛咬緊佢大髀，忽然倒抽一口涼氣……係咪？呢啲中咗嘅字眼，依家香港成日聽到，香港依家中咗毒。」

「老闆俾份人工你，一半係俾你做嘢嘅，一半係俾你受氣嘅。」

「化妝就係你落咗妝，我仲認得你，你落咗妝，我唔認得你，嗰啲叫做喬裝。」

「依家香港人生仔可以冇老婆，但唔可以冇菲傭。」

「現代嘅男人係奉行三不主義：不主動，不抗拒，同埋係不負責。」

「而家香港嘅問題，係所謂嘅婆媳糾紛，係一種必然瀨嘢嘅關係，係咪？除非你個新抱可以喺第一日入門，就全心全意同奶奶講:『奶奶，我愛你!』」

「乜嘢叫做天真？就係你相信一個藝人嘅形象就係嗰個藝人，咁樣就叫做天真。」

「女人撞衫，仲大件事過撞車。」

「一層500呎嘅樓就要500萬，已經係豪宅，閣下只需要擁有一層500呎嘅樓就係富豪…遲吓做唔到500呎樓嘅富豪，就要做300呎嘅富豪，再遲啲要做100呎嘅富豪！」

「男人係愛情上係要求新鮮，而女人對愛情最大嘅要求就係保鮮。」

「人類有人類自己嘅食物鏈，人類嘅食物鏈簡單好多，只有三種。最下層係無產，中層係中產，頂層係X家產！」

「你愛嘅，你得唔到；你唔愛嘅，你甩唔到。」

「上帝創造處女，男人創造婦女。」

「人生三大矛盾：搵食啫，犯法啊？我想㗎？」

「年輕人冇嘢叻，最叻質疑上一代，否定一切，我唔係老竇，係腦殘……似喪屍唔諗嘢，淨係識搵錢搵錢。」

「男人喺愛情上係要求新鮮，而女人對愛情最大既要求就係保鮮。」

「大自然所有嘅動物都喺食物鏈上面。鏈嘅下層俾鏈嘅上層吃，一層一層咁鏈上去。」

「當乜嘢人都唔搵我做嘢，我就知道，我係一個偉大嘅藝術家，在生嘅時候係唔會獲得應得嘅尊重。唔止咁，我仲偉大過偉大嘅藝術家，因為我知道，我死後都唔會受到尊重。」

「啲猪扒令到我哋啲男人好唔安樂，不過就令到你哋啲女人好快樂。」