So Ching蘇芷晴取消追蹤COLLAR前隊友 被問同「佢哋」有冇聯絡直指一切順其自然

女團COLLAR前成員So Ching（蘇芷晴）喺今年5月退團，專心照顧男友李啟言（阿Mo），及重回跳舞老師行列。日前佢喺IG限時動態大玩「你問我答」；當中有網民問「同佢哋仲有冇聯絡？仲係咪朋友？」令人不禁聯想起「佢哋」就係COLLAR 7位成員，而So Ching就咁樣回答。

日前So Ching與網民喺IG限時動態大玩「你問我答」，有唔少網民都關心So Ching仲會唔會繼續發展幕前工作，好似「幾時再出唱片」及「有無興趣做演員」，而佢就分別回答話：「有受寵若驚既（嘅）感覺，仲有啲無cap到出尼（嚟），唔知將來會點，一切都係順其自然，依家好好鞭策自己裝備自己，等唔同機會來到自然有得選擇」及「都有㗎，以前細個好鍾意每睇完一套戲就响屋企趁無人時，ff自己係其中一個鍾意既（嘅）角色，講下對白做下戲咁」。

有網民問：「同佢哋仲有冇聯絡？仲係咪朋友？希望個問題唔好令你反感，我冇咁嘅目的，純粹好奇。」而So Ching就回應話：「呢到既（嘅）『佢哋』我會解讀為好多唔同人，我諗主要係同我價值觀唔相似嘅人but it’s okay，一年多呢段時間入面發生咗好多大大小小既（嘅）事，仍然學習緊點樣放下一d執著，令自己唔好咁唔開心，一切順其自然吧~」雖然呢位網民冇講「佢哋」喺邊位，不過依然令人不禁禁聯想起「佢哋」就係COLLAR 7位成員，同時有網民發現So Ching已經取消追蹤所有昔日嘅COLLAR隊友嘅IG帳戶，只係仍然追蹤前經理人Wing，而COLLAR成員就有追蹤So Ching，唯Winka只有追蹤日本排舞師及COLLAR官方帳戶。

另外，仲有網民問及阿Mo嘅情況：「阿mo而家進度點啊？有無好轉啊」，So Ching就回應話：「唔方便代佢答，但請大家繼續為佢集氣，留意每個星期六的代禱信」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！