Spice Girl復出 挖返佢地部舊戲熱身先！

90年代流行音樂偶像女團始祖Spice Girls宣佈今年重組同開演唱會，連英國唱得天后Adele都忍唔住post IG表示佢有幾期待同興奮！可能會有讀者表示「而我不知道Spice Girls是誰」，或者又會以為我懷舊，咁有啲人同事值得懷舊同珍惜嘅，特別係佢地都仲唱得跳得同keep得好好！

呢隊喺1996年以《Wannabe》出道一炮而紅嘅英國女團，如果你係MTV台（或者有線YMC台）觀眾就一定識得佢地，當時一轉台就會聽到「I tell u what I want what I really really want」咁滯。一出道就大紅因為歌曲夠catchy，而且成員定位非常鮮明，由「Ginger Spice」Geri、「Scary Spice」Mel B、「Sporty Spice」Mel C、「Posh Spice」Victoria (即係碧咸嫂）同「Baby Spice」Emma組成，5位女子各有形像定位，兼強調「Girl Power」，早早已經講緊女性主義，成為萬千少女祟拜對象。

雖然團體活躍年期唔算長只有5年，但係出過3張大碟仲打入美國市場，成為英國流行樂壇代表，連2012倫敦奧運會都要請佢地重組出山表演。因為係事隔多年再次重組，成件事好有gimmick，所以得到廣泛報導仲吸引左唔少樂迷死守睇直播睇閉幕表演！

偶像做演員拍戲好平常？但拍戲做自己就好少見，Lady Gaga拍《星夢情深》嘅角色幾度身訂造，都係演飾Ally而唔係本色做Lady Gaga；韓流嗰邊，Big Bang同BTS都有電影？不過佢地果套似紀錄片加幕後花絮多過劇情片。 今日就同大家重溫下1997年Spice Girls拍戲做返自己嘅電影《辣椒狂熱》（Spice World)。

套戲講佢地5個人坐住架雙層巴士周圍走開演唱會，中途司機唔見左人，所以Victoria（碧咸嫂）決定自己揸車趕去開show。過程有飛車、經過樹林有外星人問佢地攞簽名，幾位成員仲因應情節不停變裝，由007到瑪麗蓮夢露，連《職業特工隊》天花吊落嚟一幕都玩埋，當然唔少得佢地唱歌跳舞嘅片段，嚴格嚟講無咩劇情得一堆笑位。

不過當時大家好受落，香港台灣都有做，單係美國開畫日已經收1100萬美金，只係輸左俾《鐵達尼號》！今時今日唔知仲有無偶像咁有叫座力呢？