下流上車族｜林景程演活衰仔「要狗唔要媽」 獲網民激讚：做戲好過好多一線小生

TVB台慶劇《下流上車族》正在熱播中，劇集搵嚟實力派演員鮑起靜、江美儀及林敏驄，再加上郭柏妍、羅毓儀（Yuki）及丁子朗等新晉演員出演，講述車家用盡下流手段為求上車成功。唔少網民都大讚劇集題材夠貼地，兼大讚演員表現出色，當中包括林景程。

上星期五（21日）劇情就講到毓霞（鮑起靜飾）再一次與囝囝家寶（林景程飾）為爭奪狗狗次郎而發生爭執，家寶除咗向管理員舉報媽媽養狗之外，仲親揭「要狗唔要媽」嘅真相。原來家寶囝囝太郎喺移民日本後未能適應當地生活，唔單止失眠，甚至嚴重到返唔到學。毓霞鬧爆家寶係拆散太郎同次郎嘅真兇，又話佢移民呢個行為好自私，而家寶就反駁話自己都好想留喺香港，而自己嘅老細又係自己外父，其實佢都適應唔到日本嘅生活，不過為咗下一代著想，只好選擇移民。之後，家寶再鬧爆阿媽，直指佢行為自私，咩都淨係諗自己，完全冇為個孫著想。喺呢個時候，咁啱太郎打電話俾家寶，最終令毓霞屈服。

呢一集出街後，唔少網民大讚呢一場戲充滿戲味及對白貼地，另外唔少網民仲留言大讚林景程好戲，例如「成套劇都好好睇，雖然你有少少衰，但都演繹得不錯」、「衰仔 演得係好嘅」、「個劇本好好 簡直演活左個角色 題材好貼地 」、「閔家寶演得很入形入格」、「好戲之人阿仔做得好好」、「阿仔做得好好」、「呀仔 好戲左好多 佢個吓忍住道氣來鬧自己呀媽呢part 真係好得好好」、「鮑姐好好戲，佢嗰仔都交到戲，嗰演員做戲好過好多一線小生」、「林景程本身戲都ok，呢度都做得幾好，頭先忍住度氣鬧鮑姐，一到個仔電話嚟吸咗啖氣即轉溫和開心；聽晚聽到鮑姐講次郎又唔見就爆發，真心幾好戲，呢啲應該唔止個演員自己，導演引導同要求都應該幾好。」、「佢d戲真係幾好」及「真係演得好 好到想打個衰仔」等等。

現年38歲嘅林景程，畢業於香港理工大學物理治療系，喺07年參加過英皇新秀歌唱比賽，兩年後參加《超級巨聲》後而入行。入行13年嘅林景程喺2012年開始拍劇，不過都係飾演配角居多，例如《On Call 36小時》、《四個女仔三個BAR》、《超能老豆》、《三個女人一個「因」》、《是咁的，法官閣下》、《殺手》及《香港愛情故事》等等。喺上年佢憑《香港愛情故事》中生鬼嘅演技，演活地產經紀角色，搶鏡程度爆晒燈，仲首度獲提名「最佳男配角」獎項，演技備受認同。

佢除咗係演員之外，仲係物理治療師，現時兼顧兩邊嘅工作。因為熱愛演戲嘅關係，即使好辛苦都冇選擇放棄。林景程仲話試過放工沖完涼，就要返物理治療，雖然好攰但都會盡量安排好時間。至於感情方面，林景程喺上年11月與拍拖12年嘅圈外女友拉埋天窗。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！