何廣沛生日做阿四摸唔透朱朱

本月3日生日的藝人何廣沛，昨日現身活動時透露晚上約了緋聞女友朱晨麗（朱朱）等演員食飯慶祝，並踢爆對方竟然叫他自備生日蛋糕，笑言對她有這個想法大感佩服。

何廣沛與譚嘉儀等昨日出席八月星辰活動，明天是廣沛的31歲生日，問到朱晨麗有何表示？他透露昨晚會跟朱朱在內的《大醬園》演員食飯及為八月生日的演員慶生，他趁機大呻：「我、吳岱融、楊卓娜同導演都係八月生日。朱朱打電話叫我負責買蛋糕。我話：『吓！生日嗰個買蛋糕畀自己。』我諗佢唔記得咗我生日，佢話今晚個飯局唔係慶祝導演生日咩，之後就話佢會搞掂個蛋糕。」

儲首期買樓

何廣沛笑言佩服對方有這個提議，指她是個特別的女生，要點時間才能摸透，問到朱朱是否肯讓他摸個透？他尷尬說：「我唔識答，好露骨。」對於有指同劇的龔嘉欣與朱朱不和，他稱不清楚，亦不知嘉欣會否現身今次飯局。講到生日願望，他坦言最想儲到首期，在將軍澳置業方便返工。

譚嘉儀寧Dry勿濫

而龔嘉欣昨日接受訪問時表示知道大家吃飯，但因不在港未能出席：「我唔喺香港呀！尋晚返嚟錄完《娛樂大家》，之後又即飛咗第二度做嘢，吳岱融好好，幫大家安排菜單同酒水，惟有等之後返嚟香港再約啦！」

另外，譚嘉儀表示生日會跟朋友食飯及舉行粉絲聚會，自嘲無異性陪慶生，也不會特別「恨」拍拖：「單身好過同咗錯嘅人，以前好快就同一個人去開始感情，依家睇定啲先。」