【台語世界】媠花正怯勢命

文／顏美雀 GânBí-chhiok
辛辛苦苦hoa̍t囝栽
Khîⁿ-khîⁿ lia̍p-lia̍p晟長大
揹著青春
踏入異國ê 經濟舞台
媠tang-tang ê 面模仔
在koh利 ê 內才
巧koh gâu nǹg-chǹg
真受主管 ê 疼愛
離鄉幾落載
Mā有意中人
互訴情懷
千金女配二婚夫
重重疊疊 ê 阻礙
好夢難圓thàn 無奈
病神纏身險險仔害
佳哉愛人仔有陪伊轉- -來
就醫手術運bē-bái
爸母tháu開心結chhim了解
海焦石爛愛無改
好事成雙天安排
結婚mā才兩冬外
酸雨天頂潑
新郎身體遇變卦
Chit-má 嗚呼入黃泉
放某放囝koh 放娘
阿媽m̄-kam怨出聲
暝猶hiah長路歹行
Súi花正實怯勢命
台灣字（白話字）版
Súi-hoe Khiap-sì Miā
Sin-sin khó͘-khó͘ hoa̍t kiáⁿ-chai
Khîⁿ-khîⁿ lia̍p-lia̍p chhiâⁿ tióng-tāi
Phāiⁿ tio̍h chheng-chhun
Ta̍h-jı̍p ī-kok ê keng-chè bú-tâi
Súi-tang-tang ê bīn-bô͘-á
Chāi koh lāi ê lāi-châi
Khiáu koh gâu nǹg-chǹg
Chin siū chú-koán ê thiàⁿ-ài
Lî hiong kúi-lo̍h chài
Mā ū ì-tiong-jîn
Hō͘ sò͘ chêng-hoâi
Chhian-kim-lú phòe jī-hun-hu
Têng-têng tha̍h-tha̍h ê chó͘-gāi
Hó-bāng lân-îⁿ thàn bô-nāi
Pēⁿ-sîn tîⁿ-sin hiám-hiám-á hāi
Ka-chài ài-jîn-á ū pôe i tńg- -lâi
Chiū-i chhiú-su̍t ūn bē-bái
Pē-bú tháu-khui sim-kat chhim liáu-kái
Hái-ta chio̍h-nōa ài bô kái
Hó-sū sêng-siang thiⁿ an-pâi
Kiat-hun mā chiah nn̄g-tang-gōa
Sng-hō͘ thiⁿ-téng phoah
Sin-lông sin-thé gū piàn-kòa
Chı̍t-miā o͘-ho͘ jı̍p hông-chôaⁿ
Pàng-bó͘ pàng-kiáⁿ koh pàng-niâ
A-má m̄-kam oàn chhut siaⁿ
Mî iáu hiah-tn̂g lō͘-pháiⁿ-kiâⁿ
Súi-hoe chiâⁿ-sı̍t khiap-sì miā