【台語世界】秋天 Ê 花芳

文／蘇宴德 （So͘, Iàn Tek）
 
秋天來ah。徛tī前峰國中 ê 車棚下腳，攑頭看著車棚頂koân 一bô͘一bô͘ 紅phà-phà 黃gìm-gìm ê 花蕊。花開kah hiah-ni̍h-á 嬌豔，陣陣芳味隨風飛- -來。結束一kang ê 課，本底有淡薄á 厭倦，to̍h 因為chia ê 花ká-ná teh對我bî-bî-á笑，in ê 笑容hō͘ 我心涼脾肚開。
坐tī車 ê 內面，沿路頭殼內lóng 浮出花蕊 ê 笑容kah天然 ê 花芳味，心情開朗，沿路唱歌詩。一轉去較厝內，牽手- -ê 看著我笑微微koh teh唱歌詩，to̍h 問我講：”你敢是拄著啥物好空- -ê á-sī 抾著錢？”
大自然對咱人 ê 影響是chiah-ni̍h-á 奧妙！咱大家應該ài好好珍惜- -伊。維護大自然 ê 環境是人人 ê 責任。希望咱 ê 囝囝孫孫lóng 會當有大欉 ê 樹仔腳thang 好chhio-chhìn，lóng 會當有青翠 ê 草á埔thang 放風吹，lóng 會當有一bô͘一bô͘ ê 花蕊thang 好欣賞。
台灣字（白話字）版
Chhiuⁿ-thiⁿ ê hoe-phang
Chhiuⁿ-thiⁿ lâi- -ah! Khiā tī Chiân-hong Kok-tiong ê chhia-pêⁿ ē-kha, gia̍h-thâu khòaⁿ-tio̍h chhia-pêⁿ téng-koân chi̍t-bô͘ chi̍t-bô͘ âng-phàⁿ-phàⁿ n̂g-gìm-gìm ê hoe-lúi. Hoe khui kah hiah-ni̍h-á kiau-iām, hiah-ni̍h-á bê-lâng. Chūn-chūn ê phang-bī sûi hong poe- -lâi. Kiat-sok chi̍t-kang ê khò, pún-té ū tām-po̍h-á ià-siān, to̍h in-ūi chia ê hoe ká-ná teh tùi góa bî-bî-á chhiò. In ê chhiò-iông hō͘ góa hoaⁿ-hí kah sim liâng pî tó͘ khui.
Chē tī chhia ê lāi-bīn, iân-lō͘ thâu-khak lāi lóng phû-chhut hoe-lúi ê chhiò-iông kah thian-jiân ê hoe-phang bī, sim-chêng khai-lóng, iân-lō͘ chhiùⁿ koa-si. Chi̍t tńg-khì kàu chhù-lāi, khan-chhiú- -ê khòaⁿ-tio̍h góa chhiò-bi-bi koh teh chhiùⁿ koa-si, to̍h mn̄g góa kóng: “Lí kám-sī tú-tio̍h siáⁿ-mih hó-khang- -ê á-sī khioh tio̍h chîⁿ”.
Tōa-chū-jiân tùi lán lâng ê éng-hióng sī chiah-ni̍h-á ò-biāu. Lán ta̍k-ke eng-kai ài hó-hó tin-sioh- -i. Ûi-hō͘ tāi-chū-jiân ê khoân-kéng sī lâng-lâng ê chek-jīm. Hi-bāng lán ê kiáⁿ-kiáⁿ sun-sun lóng ē-tàng ū tōa-châng ê chhiū-á-kha thang hó chhio-chhìn, lóng ē-tàng ū chheⁿ-chhùi ê chháu-á-po͘ thang pàng hong-chhoe, lóng ē-tàng ū chi̍t-bô͘ chi̍t-bô͘ ê hoe-lúi thang hó him-sióng.