《愛．回家之開心速遞》蘇韻姿首先跑出 成功吸引網民關注

無綫處境劇《愛．回家》系列第一輯故事就以sell家庭溫暖、幽默風趣而廣受觀眾歡迎，第一輯完結後，第二同第三輯嘅收視同口碑都大不如前。之但係上一輯嘅《愛回家之八時入席》就令簡淑兒成功彈出，備受網民關注。前幾日首播嘅《愛．回家之開心速遞》又再次捧紅咗一位新人女星，佢就係《2016香港小姐競選》第四名蘇韻姿(Andrea)。

佢今次憑著飾演熊家細女熊心如一角被網民睇中，話佢演技雖然一般，但比起其他新人都尚算自然。不過最煞食嘅當然係佢勝在靚女可愛，青春無敵啦！

現年23歲嘅Andrea喺2016年港姐名列第四名，不過就比同屆嘅冠亞季軍快起跑，比賽後就已經接拍《迷》、《愛回家》、《老表，畢業喇！》等劇集。 除咗因為樣靚同性格開朗樂觀之外，佢之前喺加拿大就已經有演藝工作經驗，曾經喺加拿大啲電視到客串。佢亦自言話好想做演員，16歲就已經有人想簽佢做歌手。佢話想以演員為終身職業，所以大學嘅時候都係修讀戲劇，仲話知道劇集出街之後，一定會有人鬧同埋話佢做得唔好，不過希望大家俾啲時間佢。另外，佢仲話好多謝湯盈盈教佢用電話學廣東話，仲有丹爺、豹哥、阿蟹，冇佢哋真係唔知點應付咁多中文喎。

大家又認為呢位新人表現如何呢？