【法證先鋒IV】陳煒/黎燕珊/楊玉梅....究竟邊位前亞視女演員最好戲？

無綫熱播劇《法證先鋒IV》大獲好評，唔經唔覺就踏入結局篇，劇集雲集好戲之人，唔少仲係前亞視演員。既然劇集已經播出咗咁多集，大家又認為以下邊位前亞視女演員最好戲呢？

陳煒（煒哥）喺劇中飾演科學鑑證主任「Queen姐」，係一個性格硬淨又事業心重嘅女人，原本有一個拍拖多年嘅男友Louis（鄭子誠飾），不過就被好姊妹Elaine（康華飾）脫衣獻身硬搶，一夜情有咗Louis嘅骨肉。正當Queen打算原諒Louis時，Louis就慘遭殺死。唔少人都大讚佢好戲，可以完美演繹知性有型嘅女強人，同埋表達到女人被好朋友及男友背叛嗰種痛。

黎燕珊喺單元「水泥童骨案」中飾演尋親媽媽蘭姨，佢搵返失散廿幾年嘅智障兒子浩仔（楊潮凱飾）。黎燕珊喺多場母子戲都演得好出色，例如佢哋母子重逢、屋企溫馨對話及企圖跳樓自殺等等，唔少觀眾都話睇到眼濕濕。

謝雪心（心姐）喺劇中飾演患有初期認知障礙症嘅「馬姐」秋姐，為咗演活角色，佢仲自創口音及帶假肚腩。喺知道患病後，心姐演內心掙扎、接受現實及哭訴驚忘記重要嘅事同人嗰個痛，真係做得好好。另外，佢同法醫Dr Man（李施嬅飾）嘅主僕情誼深厚，同樣深得觀眾喜愛。

楊玉梅喺劇中單元「二次溺斃案」飾演虎媽潘卓菲，佢個女穎芝橫屍引水道。佢喺劇中飾演嘅怪獸家長，表面上為個女好，但其實唔知個女想要咩，最後仲間接害死咗自己個女。佢有多場喊戲都演得十分精彩，當中包括水渠旁認屍當場崩潰及醫院床上委屈咁喊，睇到觀眾心都酸埋。

鮑起靜（鮑姐）今次係特別客串，佢喺劇中飾演一名為仔賣女嘅尋親媽媽芳姐，雖然只係短短10分鐘嘅戲份，但佢憶女嗰場戲真係非常精彩。呢段戲講述同名同姓嘅高善（許維恩飾）遇交通意外死亡，高安（黃浩然飾）同徐意（湯洛雯飾）就幫高善搵親生媽媽，之後芳姐就憶述當年賣女，表示非常後悔，仲開咗一間叫「家門咖啡」嘅cafe。佢由雙眼通紅到流出眼淚，觸動唔少觀眾嘅心，簡直係演技大爆發。

袁潔儀喺劇中飾演King Sir（譚俊彥飾）家姐，當年老公喺颱風情況下，陪仲讀緊書嘅King Sir去追風，結果為咗救King Sir而被大浪捲走死亡，之後佢就要獨力撫養個女及細佬。早前劇情就講到佢同老公最後回憶嘅糖水舖，因為業主要加租關係，佢擔心捱唔到落去，所以聲淚俱下咁向King Sir大發脾氣，呢一幕真係睇到觀眾心都噏埋。

張文慈喺單元「粵劇團兇殺案」中飾演龍映雪（米雪飾）嘅忠心助手張淑敏，望落斯斯文文嘅佢因為想幫雪姐出頭，而教唆殺死傷害雪姐嘅人。佢喺劇中演得非常到位，特別係喺口供房嗰一場戲，劇集出街後唔少網民都大讚佢好戲。