無綫80後花旦逐個睇

有小生就當然有花旦啦，以下咁多位80後花旦，邊位最得你歡心呢？

胡定欣 （1981年出世）
由行行企企嘅茄哩啡去到擔正做女主角，胡定欣去年憑著劇集《鬼同你OT》成為第一個80後視后，演技應該冇人會質疑啦！而���胡定欣就忙緊拍攝劇集《來自喵喵星的妳》，呢套劇係《鬼同你OT》原班演員拍攝，希望到時可以睇到繼「神同步」之後佢再次同田蕊妮合作有啲咩火花啦！

朱千雪 （1988年出世）
其中一位被力捧嘅小花，12年參選港姐入行，未卸任已經被欽點與崔建邦一齊擔任《勁歌金曲》主持同埋欽點參演台慶劇《On Call 36小時 II》，啱啱播完嘅《EU超時任務》仲係佢第一次做女主角。甚有觀眾緣嘅佢，雖然演技仍然有唔少改善嘅空間，但係就俾網民力讚，話佢演戲自然唔造作，更獲封做視后接班人。喺正值「上位期」，佢偏偏選擇以半工讀嘅形式重返校園修讀碩士課程增值自己。

李佳芯（1982年出世）
Ali近年憑著主持節目《學是學非》開始被人留意，加上喺劇集《名門暗戰》飾演小三、《倩女喜相逢》飾演九尾狐及早前喺《潮流教主》飾演老公走佬嘅女強人，全部都入型入格，網民對佢嘅演技更加有讚冇彈，Ali想唔上位都難呀！

黃翠如 （1981年出世）
過檔無綫後極速上位嘅翠如BB，劇集同綜藝節目輪住播，睇佢同洪永城一齊拍旅遊節目都ok嘅，但係一睇佢拍劇就冇眼睇，被網民話佢唔識做戲、每個表情都一樣等等。可能無綫認為演技麻麻無所謂啦，最緊要盡快入屋，演技係需要時間去磨練㗎嘛，所以你有你鬧，佢有佢繼續有劇拍。事業一帆風順嘅翠如BB，最近仲同前年撻着嘅蕭正楠合作拍緊新劇《幕後玩家》。早前翠如BB個爸爸間土木工程公司上市，蕭正楠都有份出席上市儀式，仲間唔中見到佢哋喺社交網站po合照，睇嚟佢哋感情穩定，打風都打唔甩，期待你哋嘅好消息呀！

岑麗香（1984年出世）
選美出身嘅香香算係呢幾年上位上得最快嘅藝人，拍過嘅劇雖然唔多，但被封為「宅男女神」嘅香香憑住甜美嘅樣子，成功俘虜唔少宅男的心。呢緊下星期出街嘅劇集《火線下的江湖大佬》，香香做第二女主角，到是大家又可以睇佢嘅演出啦！至於感情方面，香香喺上年公開戀情，雖然同6尺高任職國際金融集團高層嘅男友強強分隔兩地，但係佢哋關係仍然好sweet感情穩定。

鍾嘉欣 （1984年出世）
今年成為人妻嘅嘉欣BB，當年憑住樣貌清純成為「宅男女神」，一出來拍劇已經經常俾人話佢演技幼嫩。但自從佢喺《點解阿Sir係阿Sir》及《玩嘢王》嘅爆喊演技之後，唔少人認為佢淨係識演喊嘅戲份。之後喺劇集《華麗轉身》同《警犬巴打》嘅演技都俾網民勁彈佢演技浮誇。

唐詩詠（1981年出世）
因為外形清純、樣子甜美，所以唐詩詠一直俾人清純乖乖女嘅感覺。演出經驗豐富嘅佢，多年嚟有份參演嘅劇集多不勝數，終於佢嘅演技獲得認同喺10年奪得「飛躍進步女藝員」。唐詩詠最為人所知嘅戀情就係同過崔建邦同埋洪永城，而家佢同洪永城拍拖都唔係咩嘢秘密，更被指已經發展到同居關係。

林夏薇（1987年出世）
2011年背上「林峰表妹」之名加入無綫，直到喺劇集《單戀雙城》先開始俾觀眾留意，之後喺《寒山潛龍》、《收規華》及早前播完嘅《公公出宮》都表現亮眼，睇得出佢落咗好多心機，有時佢嘅表現仲突出過啲女主角添呀！