純粹港嘢：一個女仔識煮嘢真係好加分

隨住年紀嘅增長，無論男或女嘅擇偶條件或者側重點都會唔同左，細個拍學生拖時最緊要睇眼緣講感覺，基本上只要互相鐘意就可能好快一齊。出左社會做嘢之後或多或少都會實際左，就算遇上心儀對象都會停一停、諗一諗，對方除左外表令你心動外，大家係價值觀、性格、生活習慣等內在條件夾唔夾。

就好似做學生妹個陣可能會比運動叻嘅校隊男仔吸引，但大個左會發現比起打波勁，漸漸地內心會更希望另一半識得整電腦，睇地圖同可以自行組裝到宜家家俬個組合櫃。

男人都一樣，雖然佢地以前鐘意校花，大個都會依然迷戀女神，但真係要搵一個穩定嘅另一半時，如果發現對方原來係家政王，執得一手好屋得黎仲識得煮返幾味時真係會好加分！

當然香港貴為美食之都，就算唔想落街都隨時可以叫到唔同款式嘅外賣，但一世人流流長，總唔能夠成世都出街食架？就算唔為胃口著想，人大左都會為健康考慮，試過自己獨居又唔識煮飯嘅朋友仔應該會特別有共嗚，外面餐廳嘅嘢幾惹味都好，只要食超過半個月一定會好想返屋企食飯。搵到個識煮飯嘅另一半，未必需要佢餐餐煮，但偶爾知道返屋企有湯飲，有煮家飯食真係會好有幸福感。

尤其當兩個人決定有一下代嘅時候，其實真係要有其中一個人識煮飯，起碼小朋友開始要轉食糊仔時，屋企都要有人識得整。當然，好多人會覺得有錢請工人做咪得囉，但其實對於小朋友黎講，媽媽或爸爸的味道係建立親子關係嘅重要一環，屋企人知道你做嘢辛苦，當你返去食飯時會特登煮你鐘意食嘅餸係食得到嘅愛。有朋友曾經抱怨，因為屋企自細有工人媽咪從來都唔煮飯，工人換左三手，佢會掛住第一個工人煲嘅湯，亦偶爾會好想再食到第二個工人炒嘅家鄉菜，但最大嘅遺撼係佢從來無試過所謂媽媽的味道，亦會好羨慕身邊朋友有得分享最鐘意食屋企人煮嘅咩餸。

可能生活環境同條件都唔同左，新一代嘅小朋友基本上全部都會識用電腦，就好似上一代嘅阿媽幾乎個個都會識得煮飯一樣，而呢一項傳統上覺得女孩子應該要掌握嘅生存技能，到左我地呢一代就變到好似特技咁，身邊識得煮嘢食或者婚後會係屋企煮飯嘅女仔越黎越少，Facebook只要有朋友post親「親自下廚食物照」都會特別多Like，如果個個女仔咁岩有另一半，就會有好多羨慕+1嘅留言。莫講話男仔，我作為女仔見到有朋友娶左個煮嘢食好叻嘅老婆都真心羨慕，每次見到佢係Facebook曬「今日又有新菜式」，都會有種覺得我係男人都真係會想娶佢老婆嘅感悟。所以近排身邊有人妻朋友話想搵D嘢學，我都第一時間建議佢去覺煮嘢食，真係覺得呢門係一門畢生受用嘅手藝。

男人內心暗暗會希望女仔識煮飯，同女仔遇到識整電腦嘅男人會加分一樣，唔係事必要你識，但如果交往過程發現你原來識，其實內心真係會開心左一嘢。

純粹思考題：調返轉，一個識整電腦嘅女人同一個識煮嘢食嘅男人，對異性黎講又會唔會加分呢？

TEXT / Diana CHIU

圖片來源：http://cdn2.ettoday.net/images/891/d891917.jpg