Yahoo奇摩新聞 
繼續風騷！索妻林夏薇透視晒線
藝人林夏薇的金融才俊老公莫贊生(Jason)早前被爆情史，原來佢除了追過多位娛圈女星，與前嫩模組合「Donut」成員朱裕琳(Caroline) 拍拖三年，出錢捧對方之餘，更在西貢金屋藏嬌！不過夏薇依舊懶理傳聞，呢晚出席首映禮時一樣係咁風騷，着上性感透視裝謀殺菲林！最搞笑係夏薇竟然話一向唔覺自己特別性感，咁唔知佢幾時展示真正的「性感」俾我哋睇呢？
現年29歲的夏薇去年七月與45歲的Jason結婚，婚禮在山頂一座超級豪宅低調舉行，男方據知是多家私人公司及上市公司的股東，身家超過二十億；而夏薇則出身自廈門顯赫望族，其伯父林華國(即林峯父親) 更有「廈門首富」之稱，兩人可謂門當戶對！
不過Jason除了婚姻及事業兩得意，從前的感情生活亦相當精采！多年前佢就曾向朋友自誇，追女仔未試過失手，追唔到的只有兩個，就係陳慧琳及鍾嘉欣！而多年前佢曾與嫩模組合「Donut」成員Caroline 拍拖三年，兩人除了同住在西貢御花園獨立屋，又送Mini Cooper供女友代步；另外女方一直希望做明星，於是Jason亦暗地出錢捧紅女友！
夏薇早前錄影遊戲節目時，成為傳媒爭相訪問的對象，被問到喺屋企有冇審問老公，佢就只係話︰「每個人都有過去，唔使諗咁多。」夏薇坦言與老公之間沒有秘密，所以兩人睇完報道都係得啖笑。同時又再宣布，因為其飲食王國又再擴充，旗下食肆已經開至第十間！
呢晚夏薇在紅地氈上性感示人，着住黑色透視上衣配長裙，黑Bra及事業線若隱若現，好索呀！但夏薇接受訪問時就話並非刻意性感，最緊要係靚同配合場合。另外又表示唔怕老公Jason會投訴，因為自己一向行健康、大方的路線。
睇埋背面先！不過呢張相的亮點除了夏薇白滑玉背，仲有馬貫東對眼究竟望緊邊呢……
其實大家都發覺夏薇成為人妻後頻頻大解放，不時都在網上晒索爆泳衣照益粉絲，對此佢就話並非刻意，游水就當然係着泳衣啦！至於其他場合都多次性感示人，夏薇就話自己冇為意，仲搞笑咁話︰「等我留意吓先！」
另外首次為動畫配音的夏薇直言過程非常好玩，佢本以為成件事好簡單，但試咗兩句後即深受打擊！所以之後返屋企同老公狂睇，睇咗超過十次，最後配咗幾個鐘頭先完成，相反黎耀祥就快手得多！
祥仔今次在動畫中聲演孫悟空，觀眾們應該仲記得，多年前祥仔在電視劇中飾演豬八戒堪稱經典，未知佢會唔會想演孫悟空？祥仔就笑稱孫悟空又要黐毛又要打，自嘲年紀已經唔輕，豬八戒都做唔到啦！依家只可以做如來佛祖。
