葡萄友：一家四口酒店房自殺 亞洲猛鬼酒店逐間數

日前澳門大倉酒店發生一單悲慘命案，一家四口來自印度嘅住客於酒店房集體服毒自殺，父親及長子已身亡，幼子仍然昏迷未脫離危險期，只有母親甦醒，指因為丈夫失業，生意失敗及欠下巨債，所以決定同死。大倉酒店瞬間成為「兇店」，唔少網民都表示怕怕，話明以後都唔會入住咁話！其實酒店經此一役，呢間房99%都永久封閉架喇，不過住喺同層都一樣咁驚，咁係咪要封晒全層？講講下，不如成間封咗佢吧啦！今日為大家講下世界有名嘅猛鬼酒店，大部分都係經歷過命案，以致長期成為鬼故話題焦點。

泰國曼谷First Hotel
1988年一場大火吞沒9層樓高嘅酒店連商場，造成13人燒死、36人受傷，死亡嘅住客更包括當年一位著名新加坡歌手Shi Ni。據說當年有一對母女死於停車場內，所以佢哋嘅鬼魂從未離開，泰國人都唔會去呢層泊車！目前酒店已經喺旁邊起咗新翼，但如果爆滿，一樣會安排住客入住舊翼，小心小心。

中國北京 Buma Inn
著名鬼酒店，據講當年一位住客喺餐廳食飯時同廚師爭執，及後廚師竟然落毒，將住客毒死，然後再畏罪自殺。及後酒店一直傳出該位客人嘅冤魂一直逼留喺酒店，四處找尋該廚師希望報仇，有唔少客人表示夜晚經常見到有人影出現喺走廊，尤其餐廳等地方。

日本新宿華盛頓酒店
2008年24樓一個房間傳出惡臭，及後竟然發現一條女屍，死去多時，懷疑係同行嘅男友人所殺，但凶手一直未捉到。自此之後，24樓經常傳出女人叫喊聲，非常淒厲，又不時傳嚟哭聲；更有住客表示房門半夜被敲，但打開門又無人，以致經常有客人嚇至退房。

台灣台北時代大飯店
呢棟有240間客房嘅酒店被列入台灣十大凶地之一，曾發生多單命案，1984年發生大火造成19人燒死，事隔12年又再發生火災，2 人燒死；及後斷斷續續發生跳樓自殺，情侣雙屍命案等，非常邪門！住客話不時遇到鬼魂，又傳出哭喊聲，「被鬼壓」等更係經常發生嘅事。