【車廂幽會斷正】黎振燁冇影 朱智賢謝東閔開記招交代 謝東閔：會陪佢走過呢一關

無綫上位小花朱智賢（Ashley）與人夫黎振燁（Jackson）前晚傳媒踢爆上月因拍新劇《食腦喪B》撻着，分別瞞着緋聞男友謝東閔及懷孕8個月嘅老婆喺車廂幽會兼食心形蛋糕。噚晚更被指佢哋唔係首次幽會，喺4月22日黎振燁去陪朱智賢睇醫生，之後去老地方幽會，但係就冇陪臨盆在即嘅老婆去做產檢。而無綫就安排咗朱智賢及謝東閔今日大約4點半開記招交代。

喺記招開始時，謝東閔首先發言話自己好擔心朱智賢，驚佢承受唔到今次嘅壓力，話朱智賢已經同佢講咗成件事，仲話自己會陪伴朱智賢走過呢一關。之後，謝東閔就話朱智賢可能一時之間有啲迷失，不過佢覺得佢都有啲責任，可能自己成日掛住工作，導致疏忽咗朱智賢。最後佢話朱智賢係一個好勤力嘅演員，希望大家可以俾機會佢反思，將來繼續俾心機工作。

之後輪到朱智賢發言，佢首先講對唔住，話自己令大家失望。佢喊住話知自己做錯，好對唔住錫佢同俾機會佢嘅人，辜負咗佢哋同公司。最後佢同事件受傷害嘅人真心講對唔住。佢哋冇接受傳媒採訪就離開現場。