《那些我愛過的人》趙頌茹相隔16年再拍無綫劇 以巴渣潑辣大肚婆驚喜登場

無綫新劇《那些我愛過的人》充滿新鮮感，除咗有好多新面孔及新嘅演員配搭之外，仲有好耐冇拍劇嘅演員都有份客串，講緊嘅就係相隔16年再拍無綫劇嘅趙頌茹（阿Yu）。趙頌茹喺劇中飾演方書文（連詩雅飾）舊同學兼方樂汶（黃翠如飾）嘅保險客戶Angela。性格巴渣又潑辣嘅佢因為胎盤前移問題要剖腹生仔，但佢又不想開刀，於是搵婦產科醫生方書文幫忙。但書文嫌佢麻煩而唔接佢個案，Angela只好搵樂汶幫手，最後喺書文嘅幫助下順利誕下BB。

趙頌茹 (阿Yu) 當年參加歌唱比賽後被星探發掘，以「翻版鄭秀文」身份出道，2002年推出首張專輯。雖然趙頌茹喺2004年退出娛樂圈，不過都有多首代表作，例如《大孩子》、《發奮》、《唔該行開》及《柚子》等等。除咗唱歌之外，阿Yu都有參與電影及劇集拍攝。2004年阿Yu首次接拍無綫劇，喺《青出於藍》中飾演學生徐皓月，當時佢同前夫周永恒因為拍呢套劇而撻着，直到2010年結婚並喺同年生咗大女周信希、兩年後生埋二女周愛希。後來兩人因為家暴及婚外情問題鬧到滿城風雨，最後分居3年後正式離婚。但「世紀賤男」周永恒離婚後，火速和內地女友陳薇奉子成婚，仲生埋仔，而單親媽媽趙頌茹 (阿Yu) 就用咗好一段時間跨越傷痛重新出發，而家努力賺錢養家湊大兩個女。

今次趙頌茹喺《那些我愛過的人》嘅演出，唔少網民都話好驚喜，紛紛喺佢社交網站留言：「睇到你出現的一刻 有驚喜！😬」、「自從青出於藍真係太耐冇見你😍」、「見到你出現都好驚喜😆」、「估唔到！望左好耐⋯⋯咁似你😆 原來真係你」、「原来真係你！唔怪之得咁熟口面啦！👍🏻」及「有睇呀，好驚喜，希望以後多啲係幕前見到你啦」等等。