【集體回憶】呢班童星你認得幾多個？

電視同電影中童星嘅出現往往成為焦點，但係童星總有長大嘅一日，佢哋大個咗之後，你又認得幾多個呢？

冼迪琦

6歲時參加無綫綜藝節目《殘號一叮》，之後轉戰《放學ICU》做小主持，冼迪琦（小迪）細細個塊面肥嘟嘟好可愛！而第一部參與嘅電視劇《隔世追兇》飾演楊卓娜（丁芷韻）嘅童年。之後參與多部劇集《師奶兵團》、《學警狙擊》、《烈火雄心3》，就連《愛．回家》都有佢嘅蹤跡。但就真係女大十八變，大個女之後參加咗日本AKB48嘅姊妹團TPE48喺台灣發展衝出香港。但係打扮已經今時不同往日，日本風嘅打扮，唔講都真係認唔出佢就係當年嘅童星。

李日昇

現年27歲嘅李日昇已經拍劇無數，喺《城寨英雄》中飾演傻仔「小智」後開始被人關注，而佢上年喺《跳躍生命線》中飾演救護員張啟冠同樣備受讚賞。而佢嘅童星時代《妙手人心2》、《皆大歡喜》及《溏心風暴之家好月圓》等嘅演出，可能未必係大家最深刻。反而電影方面，佢都可以話係杜琪峰嘅御用童星，好似《文雀》、《神探》及《黑社會》都有佢嘅演出。其實李日昇曾經想放棄演藝事業投身消防員，但得到前輩黃浩然提點之後加入藝員訓練班。都係嘅，你睇佢一身肌肉唔做幕前真係有啲嘥咗！

莊錠欣

10歲已經開始參與拍攝無綫劇集，好似有《On Call 36小時II》、《巾幗梟雄之義海豪情》及《老表，你好Hea！》等等。 另外，佢仲係香港兒童少女組合「Honey Bees」嘅成員。喺2015年，佢去咗韓國參加選秀活動，之後仲加入咗韓國女子組合CLC。

成展權

童星除咗可以幫手拍劇集同主持節目之外，以往香港電台製作嘅「教育電視」都出產過唔少童星。成展權喺「教育電視」上出現嘅頻率都可以話係童星之最，之後佢都有拍過劇集《十月初五的月光》、《陀槍師姐4》及《雙面伊人》等。最後佢冇選擇繼續幕前工作，但係大家睇睇佢大個仔之後個型仔樣，會唔會覺得有啲可惜？

成珈瑩

成展權嘅妹妹成珈瑩，佢就係喺《烈火雄心II》入面紀德田（王喜飾）個女紀瑤，同埋《陀槍師姐3》入面陳三元（滕麗名飾）個女程莎莎，佢嘅表現令人印象深刻。2006年退出幕前，但大個女之後嗰份笑容依然不變！

張預東

兒童節目《閃電傳真機》及《至Net小人類》嘅小主持「東東」張預東（前名：張裕東），一定係唔少人嘅童年回憶。而家幕前要見到佢就真係少啲機會，但係都仲可以聽到佢個把聲喎！因為佢而家係無綫嘅配音員，而且已經超過10年經驗。而佢大部份嘅聲音演出都係以動畫為主，大家又認唔認得呢？佢嘅外貌反而隱約中可以見到童星時代佢嘅影子，大家又覺得係唔係呢？