麗英首場個人音樂會舉行在即預告騷前出新歌 嘉賓待定：我有鼓起勇氣DM童年女神

「小薯茄」成員鄧麗英（麗英）除咗係一名Youtuber之外，近年佢亦都進軍樂壇，推出多首大熱歌曲，例如《東京一轉》、《矮妹正轉》同《(Not) The First Take》等等，每首都別具麗英嘅個人色彩。嚟緊（12月5日），麗英更加會喺麥花臣場館舉行首場個人音樂會，而佢亦都透露今次演唱會會延續佢鍾意嘅日系風格，呈現更加真實嘅自己俾樂迷。

為演唱會積極準備 翻出十年前彈唱片段大為感動

距離麗英嘅首場個人音樂會不足一個月，所以麗英亦都積極籌備個唱，每日努力練歌。除此之外，自知體力不足嘅佢亦都努力做運動鍛鍊，更加苦練結他為自彈自唱做準備。日前，麗英喺社交平台分享10年前自彈自唱嘅片段，並表示：「睇返自己細個雖然有少少尷尬，因為我唔係好面對到細個個樣，但係都感動嘅，覺得以前就喺學校禮堂自彈自唱，宜家可以去麥花臣自彈自唱，做返同一件事，所以都覺得開心！」麗英笑指今次想專注自彈自唱，唔會喺演唱會上跳唱：「跳舞係免費內容，大家俾錢入場睇Show係付費內容，所以就冇得睇。」

延續一貫日系風格 嘉賓待定：我有鼓起勇氣DM童年女神

熱愛日本文化同J-Pop嘅麗英今次演唱會亦都會延續日系風格：「好似今次音樂會海報大家都見到風格係比較簡單同好Bright，想做返日系好簡單好乾淨嘅感覺，同埋我自己都係好鍾意J-Pop嘅人，所以喺揀歌方面都揀咗好多動漫歌同自己好鍾意嘅J-Pop，希望喺個Show到唱俾大家聽。」至於嘉賓方面，麗英就話仍然係待定，不過就搞笑表示：「我就真係鼓起咗勇氣DM我童年嘅女神，即係Taylor Swift同Yui佢哋，但係佢哋仲未覆我DM嘅，希望佢會快啲覆啦。」

預告開Show前出抒情新歌 感激一直大家陪伴

除咗J-Pop，麗英以前都有唔少翻唱，今次演唱會入面佢亦都會翻唱其他作品，更加透露其中有一首可以喺YouTube搵到。麗英亦都透露演唱會前會再出一首新歌：「曲風上可以話俾大家聽係比較抒情嘅歌，好溫柔嘅同好日系嘅風格，主要都係想一直陪伴我嘅人，但係我用咗一個好得意嘅切入點去講呢樣嘢嘅，大家到時期待吓啦！」

Make up: Deep Choi @deepmakeup

Hair: Chorus Ko @mmaveda

Wardrobe: 制服美學 @euniformation