Edan上載與Anson Lo合照被唯粉批炒作「田牧CP」 呂爵安開直播反擊

MIRROR成員Edan（呂爵安）和Anson Lo（盧瀚霆）日前飛往日本，為電影《盜月者》進行拍攝工作。佢哋喺白色情人節（3月14日）去便利店，期間驚喜見到日版《大叔的愛》吉田鋼太郎嘅廣告海報，之後佢哋就興奮同海報合照，並上載到社交網站，不過就被「唯粉」留言鬧爆，結果引嚟Edan親自留言回應。

Edan和Anson Lo喺前年於港版《大叔的愛》飾演田一雄及凌少牧爆紅，「田牧CP」深入民心。日前佢哋再度合體，前往日本為由袁劍偉執導、以偷竊為題材嘅電影《盜月者》進行拍攝，二人喺白色情人節行便利店，期間仲興奮與日版《大叔的愛》吉田鋼太郎嘅廣告海報合照，並上載到IG。Edan以港版《大叔的愛》主題曲《突如其來的心跳感覺》作背景音樂，並留言：「睇吓我哋喺日本見到邊個！！！係原版嘅大叔！田一雄X黑澤武藏X凌少牧 世紀合照 KK唔好呷醋 #買買吓嘢見到 #吉田鋼太郎 #如果可以同真人合照就正 #想見哂原版嘅真人 #KK我心中仍然有你的」

呢個PO一出，唔少粉絲都留言表示好開心睇到佢哋嘅合照，不過亦有「唯粉」（意思：只喜歡某一成員嘅粉絲）留言鬧爆Edan：「得閒就學吓戲練吓歌，唔好浪費時間喺度炒CP啦，次次炒登神神教同爵group都嘈，你自己group mma冇所謂，唔好影響人哋先得㗎！」結果引嚟Edan親自留言回應：「得閒就睇吓書同屋企人朋友傾吓偈，唔好浪費時間喺度話人炒CP啦，次次我po同佢嘅嘢都話炒CP，我係咪唔同得我朋友合照啊，你同你朋友去旅行會唔會po相啊，你自己諗多冇所謂，唔好意圖扭曲我做嘅嘢同控制我po乜先得㗎！」之後，呢位網民就問Edan係唔係說中了，Edan再回應話：「回應你就係說中了？咁你玩晒㗎喎」

呢位網民再出PO：「咁我就講多少少自己感受，你知唔知cp呢個issue 成日令到粉絲之間嗌交，佢哋嘅over FF（有啲直情熄電視三級，好過份）同兩派CP粉嘅爭寵令人心煩，可能你只係純粹想分享同bro嘅日常開心事，但次次見到兩個群組鬧嚟鬧去都令到好多人唔開心。如果我講嘅語氣冇禮貌左我可以道歉，但希望你明白我想表達乜嘢。」而Edan亦有繼續回應：「咁嘅語氣咪大家都舒服啲囉，絕對歡迎你道歉。咁順便我都想問多少少，你係咪認為你所講嘅OverFF、爭寵、嘈交全部都係我嘅責任？如果係，你覺得我應該點樣做去解決呢？」

唔少網民都紛紛留言力撐Edan，例如「其實呢個係personal account 自己IG post乜野要由人哋控制？ 唔啱就唔好睇 支持owner繼續做自己想做嘅事」、「呂爵安鐘意post咩咪post咩囉。 其實見到呢個post 會覺得心裡唔舒服嘅人，我係理解唔到的」、「同隊友互動好正常，點解要被話炒cp」、「Edan你好型！你真係一個好有義氣嘅人」、「就係鍾意同欣賞Edan 呢份真 希望Edan 你可以keep 到呢團火，我地撐硬你」、「呂爵安真係型到爆 唔需要理啲無謂人，自己IG自己話事」及「啲回憶返晒嚟！Btw, 你鍾意po乜就po乜，唔洗理啲無聊人！」等等。

去到噚晚，仍身在日本嘅Edan喺IG開直播，佢揀咗一個「莫生氣」嘅filter，再次回應被指炒作「田牧CP」，佢就話已經唔係第一次發生，只要上載同Anson Lo嘅合照都會收到好多dm，部分人鍾意用『密友』形式tag佢，令佢覺得好唔舒服，因為佢冇得揀唔睇嗰個限時動態，好似被逼俾人問候。之後，佢亦否認炒CP：「如果我真係做緊嗰啲嘢，你鬧我我都抵，問題係我唔係。」，並話最令到佢唔舒服嘅就係嗰個喺佢嘅IG，唔明點解要思前想後先PO嘢。而佢亦話「或者可能會話，你小器你嬲，或者覺得，你係咪俾人講中咗呀？」及「唔出聲就硬食，出聲就俾人話小器、俾人話嬲、話講中咗，咁其實我點都死㗎喎！」。最後佢重申自己冇嬲，只係想講好耐：「藝人係咪預咗俾人鬧？俾人鬧唔可以講嘢？我覺得唔係，藝人都係人。啲人成日講 #食得鹹魚抵得渴 ，你預咗㗎啦做藝人。呢個就叫做我預咗，但俾人鬧俾人誤解，我唔覺得係藝人必須要承受。有啲人話你賺嘅錢比其他人多，食得鹹魚抵得渴啦。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！