懷材不遇？有實力但紅唔起的4個藝人

今年已經49歲嘅麥長青（麥包）原來加入大台已經29年，一直都默默耕耘拍過唔少你同我都睇過嘅劇集，但總係做綠葉同配角，雖然6年前《巾幗梟雄》嘅非凡哥令佢攞到最佳男配角初嚐得奬滋味，但並無令佢嘅事業帶嚟更多嘅機會。原本今年麥包有機會擔正做男主角，但大台高層曾勵珍同杜之克權鬥令到佢成為炮灰不單只，仲成年都停哂無劇拍，而且睇住好多新晉入行無經驗又無演技嘅短短幾年就已經可以擔正，令到佢覺得非常失望同心灰意冷，最後選擇離開。

其實好似麥包呢啲一直深耕嘅藝人大有人在，只係佢地一直都不被睇重同重用，以下呢幾個你又認識幾多？

曹永廉
曹永廉又係另一個不斷做緣葉嘅配襯角色，出道已經22年，由1995年開始係大台拍劇無數，當中以《妙手仁心2》嘅向眾仁比較令人有深刻印象。佢就比麥包好運少少，至少係09年嘅《美麗高解像》入面做過一次第一男主角，仲係今年拎到最佳男配角奬，但攞咗奬又有無實質幫助就係一個問號啦。

陳國邦
演藝學院畢業嘅佢係1990年已經係大台演出，輾轉有過檔到亞視然後亦有番番去大台。佢嘅戲路相當廣，無論係古代權臣、市井勢利抑或係心術不正嘅奸角都演得 相當唔錯，雖然從來無係大台擔過男一或得過奬，但都得到網民嘅認同佢嘅演技。今年年尾，佢已經堅決離開大台，專注發展舞台劇。

康華
同樣係演藝畢業，係1994年加入大台，拍過近百套電視劇，演反派嘅形象例如情婦、奸妃等都相當到位，雖然後來佢嘅角色都轉向大眾討好類型，但44歲嘅佢外貌同身材都保養得好好，網民勁like之餘仲俾佢個「最正奸妃」嘅稱號。而家嘅佢中港兩地走，更曾經指「搵錢唔需要係TVB搵」，現實一早已經被佢睇透。

相片來源：麥長青 ＠Weibo