《那些我愛過的人》新演員陣容充滿新鮮感 連詩雅、蘇皓兒、顧定軒，李任燊首拍無綫劇

無綫新劇《那些我愛過的人》噚晚首播，劇集搵嚟林文龍、黃翠如、連詩雅及馬貫東等人主演，呢套劇有演員久未露面，亦有唔少新面孔，新演員配搭令劇集充滿新鮮感，等我哋一齊睇下邊幾位新鮮人啦！

連詩雅

連詩雅（Shiga）上年簽咗星夢娛樂，亦拍過唔少電影，但主演無綫劇集就真係第一次。Shiga喺劇中飾演婦產科醫生方書文，同時亦係黃翠如飾演方樂汶嘅妹妹，但七年前車禍後兩姐妹關係變得疏離。多年嚟樂汶更刻意避開書文，二人各自生活。另外，佢與馬貫東飾演嘅醫生古希晨會發展成情侶關係，仲有唔少咀咀戲添呀！

蘇皓兒

蘇皓兒（Chole）現年26歲，係前女子組合As One成員之一，係新一代氣質女神，較為人熟識嘅應該係佢同王宗堯拍拖兩年幾，不過今年年頭已經分手。今次蘇皓兒同林文龍有唔少對手戲，喺劇中飾演林文龍女兒姜子優，兩父女相依為命，不過因為反叛期嘅關係，佢同爸爸有唔少磨擦。蘇皓兒喺劇中嘅感情會周旋喺顧定軒及李任燊之間，仲獻出熒幕初吻。另外，雖然蘇皓兒已經26歲，不過佢生得可愛又不失青春稚氣，所以扮演中學生都毫無違和感。

李任燊

李任燊（Kyle）喺12年參與港台青春劇《Y2K系列》，2014年正式入行，仲拍過唔少電影及電視劇，例如ViuTV劇集《詭探》及無綫劇《救妻同學會》等等。今次李任燊喺《那些我愛過的人》飾演拳會學生莫宇謙，係子優嘅暗戀對象，又係朱嘉炳嘅好友兼情敵。

顧定軒

顧定軒喺中學開始接觸模特兒工作，畢業後就開始接拍短片、客串電影及拍攝其他電視台嘅劇集工作，今年顧定軒終於加入無綫拍劇。佢喺劇中飾演方樂汶（黃翠如飾）嘅繼子朱嘉炳，爸爸（翟威廉飾）車禍過身後由樂汶一手養大，二人關係都幾好。至於感情方面，朱嘉炳對姜子優有好感，不過可惜姜子優鍾意嘅唔係佢。