【日本|自助遊】由關西玩到九州無難度!7日6夜行程大公開(下)
上集講到玩完大阪同京都,就搭夜行巴士,通宵由京都搭去博多,開始旅程嘅下半部分。想重溫嘅可以喺呢到睇番。 >>7日6夜行程大公開(上)
第四日 博多
雖然通宵巴士好舒服,但係始終唔係正式靜靜地休息,會比較攰。所以小編就淨係安排呢日行博多市區,行街食嘢,一攰就可以坐低休息。時間彈性啲,可以隨時番酒店瞓陣。
之前有朋友去旅行嗰陣急call小編,話佢貪平買左福岡機票,去到博多運河城諗住大商場一定有得瘋狂shopping,點知去到就鬼死咁悶,嚟嚟去去都係個幾個牌子。小編即刻推薦佢去天神,有地下街有賣電器嘅Big Camera,仲有大大小小藥妝店同日牌精品店,想買乜都得。不過,一定要食左個新鮮出爐芝士撻先~
天神地下街嘅BAKE都要排隊,不過唔使等好耐。
真係不得了,不過食一個好喇,福岡仲有大把野食。
福岡係豚骨拉麵發源地,一風堂、一蘭嘅本店都喺福岡,要朝聖嘅人記得留定肚。不過講得發源地,加埋日本食品有一定品質保證,小編建議大家可以試下街上面嘅小店,小編自己食過幾間,價錢比連鎖拉麵店平,但水準一樣高。呢碗係中洲屋台其中一個攤位嘅拉麵,絕對唔差。
拉麵小編就唔特別介紹喇,因為真係一街都係。反而要推薦大家食一樣好邪惡,而且食完會令人朝思暮想嘅食物…
各位觀眾!!!即燒厚切牛脷!!!!小編見到張相,口水分泌即刻多左幾倍。偷偷地話你知,其實小編成段旅程最掛住就係呢份牛脷….
牛たん炭焼 利久‧博多駅店
地址:福岡県福岡市博多区博多駅中央街1-1 JR博多シティ9F(博多車站樓上)
鍾意睇夜景嘅話,可以去福岡塔頂樓展望室,360度睇哂成個福岡。
福岡塔
地址:日本〒814-0001 Fukuoka Prefecture, Fukuoka, 早良区百道浜2丁目3-26
第五日 熊本
想玩盡北九州,就一定要買張JR PASS,出出入入都唔會肉痛。>>JR Pass 購買方法
小編有一顆少女心,出發前已經下定決心要去搵熊本熊集郵,所以JR Pass第一個目的地,就係熊本喇!
直搗熊本部長辦公室,仲有熊本熊同各界人士嘅合照。
臨走前記得掃番啲熊本熊精品送禮自用,可愛又實用。
Kumamon Square
地址: 〒860-0808熊本市中央区手取本町8番2号
熊本仲有名勝古蹟熊本城,不過之前受到地震影響而有倒塌情況。
園內仲維修緊,未全面開放,出發前記得Confirm多次!
如果想去遠少少,欣賞大自然景色,小編推薦高千穗峽,係九州第一神聖觀光聖地!詳情可以睇>> 呢到。
第六日 豪斯登堡
豪斯登堡位於九州長崎,係日本最大歐洲主題樂園。
完全滿足到小編想歐遊但係無資金無假期嘅心~成個樂園擺明呃菲林,到到都咁靚。
夜晚著左燈,更加有童話嘅感覺。
第七日 長崎
長崎除左豪斯登堡之外,仲有好多著名景點嫁!
和平公園~
眼鏡橋~
孔子廟~
係長崎玩左大半日,之後再搭番JR出博多搭飛機,夠哂充實!有時間記得食多碗拉麵啊!
PS.福岡機場雖然唔大,但係夠集中,一定要把握買手信最後機會,價錢好多都平過市區!
▲認識KKday▲
KKday-世界旅遊體驗網站,在全球 54個國家,174 個城市, 有 5000多種不同的行程與體驗。 KKday內有最特別、最意想不到的的世界行程體驗!不論你想當一日忍者、乘坐直升機享盡奢華旅程、還是你想要與猩猩共進午餐…KKday滿足旅人不同的喜好。KKday幫你省去在各論壇爬文找資料的麻煩,一站解決安排行程的困擾!現在,想來一場與眾不同的旅行就來KKday找行程,一起去冒險吧!
KKday 網頁: www.kkday.com
KKday Facebook: KKday