【專文】 復興台灣話培養台灣認同
昨昏12月21和幾位朋友作伙去支加哥文教中心，參加一場支加哥台灣學校辦的，足有意義的演講會，主題是《在美國教Tâi-gí：對身分認同到建設台灣國》；支加哥台灣學校準備明年推出教台語的課程，特別邀請兩個演講者來分享怹在復興台灣話，培養台灣認同方面的經驗。
兩名演講者攏是少年輩，一個是加州「耕南書院」的執行長Lûi Bêng-hàn，伊分享在北加州開設台文課程，培養台灣意識的作法；另外一個是成大台灣文學系畢業的Ngô͘ Gio̍k-kīn（吳玉瑾），伊分享Y世代追尋台灣認同的個人歷程，和未來台文課程的安排。
在世界民族解放運動裡，在地文化、語言受外來統治勢力壓迫的民族，有足濟成功得著民族解放的例，攏是家己的母語佇在地強強要被消滅之時，有一寡覺醒的青年起來做恢復母語的努力，在怹拍拚恢復母語過程中，攏會帶動民族文化復興，予民族意識重生湠勇壯起來，自然著激起民族主義的奮興，促成民族團結驅逐外來勢力。
這種實例有克羅埃西亞、愛爾蘭、芬蘭和波羅地海三國等，其中，波羅地海三國被蘇聯併吞後，怹的母語是由在地地下教會和流亡海外的同鄉努力保持火脈，和咱台灣人被外來赤藍人統治後的境遇真類似。
在島內，台灣基督長老教會保持用在地會友的語言禮拜，教會內的白話字聖經在70年代被沒收禁止後，由會友家庭繼續保存；海外台灣同鄉嘛努力保存台灣話，華府的「台灣青少年文藝基金會」自40冬前著開始辦台語學校，教第二代的台灣囝仔講和寫台灣話，Lûi Bêng-hàn先生著是細漢有入華府的台語學校。
兩位演講者攏強調，咱毋但著愛會曉講台灣話，嘛著愛會曉寫台灣話，怹攏使用長老教會在台灣已經使用幾百冬的「羅馬字」或是有人講「白話字」，較主張祙用漢字，學習上必要之時，建議教師用英語解釋，全程祙用中國話。
3、4冬前，我在台灣著有警覺著有少年人在努力復興台灣話，Ngô͘ Gio̍k-kīn女士講伊在18歲進前認為家己是「中國人」，到35歲中間變作「中華民國人」，現在認真拍拚要做「台灣人」；這種認同的改變和尋著家己真正的身分，是對學台語開始問家己「我是啥？」才慢慢產生真實的台灣人意識。
吳女士指出所謂「天然獨」已經迷失台灣認同，準確地講，「天然獨」已經予反動反民族集團麻醉做「天然不獨，和今年初我在「民報」發表的《必須逆轉「天然不獨」》，仝款出自堅持台灣主體意識的批判。
吳女士予我確信有獨立自尊素養的優秀台灣青年，攏會當拆破玩弄「中華民國」、「中華」來和「台灣」做排列組合，來亂講嘿著台灣人的國家的騙局，嘛破解「台灣是主權獨立的國家」這種為著反台灣民族獨立所佈置的迷魂陣；伊嘛予我確信，當台灣少年人開始努力恢復母語，著是台灣民族主義要復興的兆頭。
專文屬作者意見，文責歸屬作者，不代表本報立場。
